Qamişlo

Rêveberiya Nexweşxaneya Onkolojî, Talasîmya û Şewat a bajarê Qamişlo bang li şêniyan kir ku bilez xwînê bidin, ji ber ku pêdivî bi xwînê heye.

Li gor agahiya ku rêveberiya nexweşxaneyê belav kiriye ev 3 roj in, xwîn di nexweşxaneyê de nemaye lewma jiyana bi dehan nexweşan di xetereyê de; bi taybetî jî zarokên talasîmyayê. Di nexweşxaneyê de bankeke biçûk a xwînê heye lê ji ber ku piştgirî û alîkarî kêm e, pêwîstî bi her kesî heye ku xwînê bide.

Hemşîreyê bi navê Ehmed El Mihemed ê di beşa Talasîmyayê de kar dike ji bo ANHA'yê gotiye: “Mijara xwînê gelek dijwar e. Li Qamişloyê bankeya xwînê tune ye. Lewma kadroyên tenduristiyê alîkariyê ji xizmên xwe yan dostên xwe dixwazin, an jî bi rêya medya dijîtal û mizgeftan bang dikin ku her kesê dikare bila were xwînê bide. Îro jî heman tişt çêbû ku bi rêya mizgefta Enteriye me bang kir û gelek şênî hatin û xwîn dan.”

El Mihemed wiha domand: “Rojane nexweşxane, nexweş ji Şedadê û gundên Dirbêsiyê pêşwazî dikin ku koma xwînê wan O+ e. Ji ber ku xwîn tune bû û kesek xwîn bide jî tune bû, kadroya tenduristiyê xwîn da. Pêwîstiya nexweşxaneyê her tim bi hemû komên xwînê heye. Bi tunebûna xwînê re jiyana nexweşan di xetereyê de ye.”

Li gorî Mihemed, dermanên bingehîn ên nexweşiya talasîmya mîna Exjade, Desferal, Deferiprone, ev 3 roj in tune ne.

Nexweşxaneya Onkolojî, Talasîmya û Şewatan a Qamişloyê li herêmê ya yekane ye. Di sala 2023`yan de hatiye vekirin. Talasîmya, şewat û onkolojî beşên wê yên sereke ne. Lê ji ber ku derfet kêm bûn, beşa şewatan temam nebû. Ev 3 sal in, nexweşxane rojane xebatên xwe ji bo bi dehan nexweşan bê pere pêşkêş dike.

Rêveberiya nexweşxanyê bi rêya ajansa me, careke din bang kir ku divê xwîn bi lez were dayîn û jiyana nexweşan bi bersivandina vê bangê ve girêdayî ye.