HELEBÇE
Bi daxuyaniyek çapemeniyê Rêveberiya Giştî ya Tenduristiya Helebceyê ragihand ku Wezareta Tenduristiyê û hikûmeta Herêma Kurdistanê daxwazên Helebceyê paş guh dikin û got: “Ew gotinên ku dikin tenê ji bo dema propagandayên hilbijartinê ne, ne tiştek dine.”

Rêveberiya Giştî ya Tenduristiya Helebceyê li Navenda X-Ray ya parêzgeha Helebceyê têkildarî tamîrkirina alavên x-ray û çend pirsgirêkên din ên di ware pêdawîstiyên tenduristiyê de, daxuyanî da çapemeniyê.

Di daxuyaniyê de Rêveberê Giştî yê Tenduristiya Helebceyê Dr. Azad Mistefa axivî û got: “Navenda X-Ray tekane navenda x-ray ya li parêzgehê ye. Nêzîkî 4 meh in amêra x-ray xira bûye. Piştî hewlek mezin bi beramber 100 mîlyon dînar hate tamîrkirin. Ji ber ku amêrek mezine budceyek mezin dixwaze. Niha welatiyên sînor dikarin bêne navendê û testên xwe çêbikin.”

'EM NIZANIN WEZARET DÊ KENGÊ CÎHAKÊ BIKIRE'
Dr. Azad Mistefa balkişand li ser pirsgirêkên din ên ku derdikevin jî got: “Ji ber nebûna emeliyata lazerê, nexweş pir caran bi vê pirsgirêkê re rû bi rû dimînin. Heta digihînin Silêmaniyê dibe ku ew kes jiyana xwe ji dest bide. Wezîrê Tenduristiyê soz daye ku cîhazê peyda bike, lê hîna çarenûsa wê ne diyar e û em nizanin ka karê dabînkirinê gihîştiye ku derê.”

BO ZAXOYÊ HEYE BO HELEBÇEYÊ TUNE YE
Her wiha Dr. Azad Mistefa rexne li Hikumeta Herêma Kurdistanê û Wezareta Tenduristiyê jî kir û got: “Nexweşxaneya kîmyabaranê beşekê xirab bûye û kes nayê ku şîrket kar bike û wan beşan nûjen bike. Wezîrê Tenduristiyê dibêje; ‘Emê nexweşxaneyek nû ji bo we vekin’. Makîneyek şikandina kevirên gurçikê ji bo Zaxoyê hatiye kirîn, lê ew bersiva Helebçeyê nadin. Ew gotinên ku dikin tenê ji bo dema propagandayên hilbijartinê ne, ne tiştek din e. Wezareta Tenduristiyê û hikumeta Herêma Kurdistanê daxwazên Helebçeyê paş guh dikin.”
Rojnews