Lîstikvanê Amed Sporê Deniz Naki derbarê cezayê lê hatiye birîn de daxuyaniyeke taybet da rojnameya almanî Die Welt û diyar kir ku sedemê cezadayina wî daxwaza wî  ya aştiyê ye. Deniz Naki ku berê di tîmên alman ên futbolê yên wekî FC St. Pauli û SC Paderborn lîstiye, niha careke din kete di rojave çapemeniya alman de.

Rojnameya Die Welt balê dikişîne ser wê yekê ku Naki bi peyameke xwe ya facebookê têkbirina Amed Sporê ya Bursasporê bi 2:1 diyarî "Mirovên ku ew 50 roj in hatine birîndarkirin û jiyana xwe ji dest dane" kiriye. Ev yek jî bûye sedem ku ew bi nelîstina 12 leyîstikan û 19.500 lîrayî were cezakirin. Cezayê lê hatiye birîn jî di dîroka futbolê ya Tirkiyeyê de wekî cezayê heta niha yê herî bilind e. Her wiha di heman nûçeyê de bal li ser wê yekê tê kişandin ku deqa "Azadî" ya li ser milê wî yê çepê jî dibe sedem ku nijadperestên tirk êrişî wî bikin.  

Die Welt bi bîr dixe ku Naki dê roja sêşemê nikaribe bi tîma xwe ya Amed Sporê re li dijî Fenerbahçeya ku lîstikvanên navdar ên wekî Robin van Persie û Nanî tê de ne bilîze Deniz Naki jî bi daxuyaniyeke taybet ji heman rojnameyê re balê dikişîne ser wê yekê ku wî li kesî nexistiye û li ser qada gokê tişteke ne sportîfî jî nekiriye. Ji ber vê egerê jî ew ne bêmoral.

Lîstikvanê ciwan ê Amed Sporê Deniz Naki di berdewamiyê de wiha dibêje: "Wan ceza da min, ji ber min serkeftina me diyarî mirovên ku rewşa wan ne baş in kir. Û ji ber ez aştiyê dixwazim. Divê hemû mirovên li Tirkiyeyê xwedî li wan gotinên min parvekirin derkevin. Ew cezayê nelîstina 50 lîstikan jî bidin min û lîsensa min a lîstikvaniyê jî ji min bistîtinin, dê nikaribin min bêrûmet bikin."

Rojnameya Die Welt herwiha destnîşan dike ku medyaya nêzîkî hikûmetê Deniz Naki wekî "xayîn" û "alîgirê PKK´ê" nîşan dide û ev dibe sedem ku kampanyaya nijadperestî ya li dijî wî gurtir bibe. 

Dermarê atmosfera lîstika bi Bursasporê de jî Deniz Naki ji rojnameyê wan kêliyan wiha tîne zimên: "Di dema lîstikê de gelek caran faul li min kirin. Du caran lîstikên Bursasporê dema ez li erdê dirêjkirî bûm pehîn li min dan. Ev ne bûyerên ji rêzê yên lîstikeke kupayê bûn. Bi her faula li min dibû re, alîgirên Bursasporê çepik lêdidan. Hesta ku em ne bi Bursa yê re bilîzin bi min re peyda dibû. Rewşeke guhertî bû. Hê pêşiya lîstikê, propagandaya li dijî me destpêkir, wekî em ne ji heman welatî lê ji gerstêrkeke din hatibin wir."

Beriya demeke kurt serokê kluba Amed Sporê Ali Karakaş jî ji heman rojnameyê re diyar kiribû ku heta niha ti tîmên ku alîgirên wê sloganên heqaretwarî û nijadperestî diavêjin nehatine cezakirin. Herwiha ti lîstikvanên tirk ji ber gotin û heraketên xwe yên nijadperestî jî nehatine cezakirin. 

Wergera ji almanî: Zekî Ozmen