Vîdeoyek:
___Cemil Oguz___
44’emîn Festîvala Fîlman a Navneteweyî ya Stenbolê îsal di navbera 11-22’yê avrêlê de li dar dikeve. Di nav festîvalê de fîlmên bi kurdî jî hene.
Bernameya Festîvala Fîlman a Stenbolê ku ji aliyê ÎKSV’ê ve tê lidar xistin eşkere bû. Di festîvalê de 139 fîlmên metrajdirêj û 15 kurtefîlm hene. Ligel nîşandayîna fîlman dê çalakiyên wekî gotûbêj, nîşandayinên taybet jî hebin. Festîval bi nîşandayîna fîlmê derhêner Ido Fluk ê bi navê “Koln 75” dest pê bike. Fîlm bi ser konsera Keith Jarrett a 1975’an de li Kolnê pêşkêş kiribû re hatiye kişandin.
HIN FÎLMÊN KURDÎ
Îsal jî hin derhênerên kurd bi fîlmên xwe yên bi kurdî beşdarî festîvale dibin. Di nav bernameyê de 7 fîlmên ku têde kurdî jî hene ketine nava bernameyê û me ew neqandin.
Ji van di beşa “Pêşbaziya Laleya Zêrîn” de 2 fîlm hene. Fîlmê Rezan Yeşilbaş ê bi navê “Uçan Koftecî” (Koftekarê Difire) û “Hîsterî” yê Mehmet Akif Buyukatalay hene.
Di beşa “Yenî Bakişlar” (Awirên Nû) de du fîlm hene. Derhêner Orhan Înce ku berê bi kurtefîlmên xwe navê xwe li nav qada sînemayê dabû nasîn, vê carê bi fîlmê xwe yê metrajdirêj “Hêvî” li festîvalê ye. Ev fîlmê derhêner Înce yê yekem ê metrajdirêj e. Li aliyê din Kenan Diler jî bi “Kavak Agacinin Golgesinde” di vê beşê de derdikeve pêşberî fîlmhezan.
Di Beşa Kurtefîlman de jî du kurtefîlmên derhênerên kurd hene. Ji van Mahsum Taşkin bi “Garan”ê, Yakup Tekintangaç jî bi “Morî” li festîvalê ye. Ev her du di beşa “Kurtefîlm 2” de têne nîşandayîn.
Û fîlmê din ku beşek jê bi kurdî ye jî belgefîlmê Esin Ozalp Ozturk ê bi navê “Işigin Hasadi” ye. Ev belgefîlm jî di “Beşa Belgefîlman” de tê nîşandayîn.
SALONÊN SÎNEMAYÊ
Fîlm îsal li Beyoglu li salona Atlas 1948 û Sînemaya Beyogluyê. Lli Şîşlî li salona CineWAM Premium+ City's Nişantaşi (Salon 3 û Salon 7), li Kadikoy jî li salona Kadikoy Sinemasi, Sinematek/Sinema Evi (Ya şaredarî) û li Paribu Cineverse Nautilusê têne nîşandayîn. Seansên fîlman di saetên 11.00, 13.30, 16.00, 19.00 û 21.30 de ne.
XELATÊN FESTÎVALÊ
Di festîvalê de xelata mezin di beşa Pêşbaziya Laleya Zêrîn de tê dayîn. Dîsa di beşa Kurtefîlman û di beşa Awirên Nû de pêşbazî heye, fîlmên di van beşan de bi ser bikevin dê bêne xelatkirin.
Di beşa Pêşbaziya Laleya Zêrîn de 15 fîlmên metrajdirêj hene. Serokê jiruya vê beşê derhênerê hindî Shekhar Kapur e. Endamên juriyê jî sazkarê fîlman Ada Solomon, senarîst û derhêner Ebru Ceylan, lîstikvan Saadet Işil Aksoy, Serokê Festîvala Fîlman a Torontoyê Cameron Bailey pêk tê.
Di beşa Pêşbaziya Kurtefîlman de îsal 12 kurtefîlm cih digirin ku didu jê bi kurdî ne.
Di beşa Awirên Nû ku bi vê beşê piştgirî didin derhênerên ciwan 11 fîlm hene. Di vê beşê de fîlmê bi ser bikeve dê Xelata Seyfî Teoman bê dayîn.
Ji bilî van sê saziyên li Tirkiyeyê yên li ser sînmeayê BSB, Fîlm-Yon û Siyad dê fîlmên serbixwe binirxînin û xelatê bidin wan.
21 BELGEFÎLM HENE
Di beşa “Dema Belgefîlman” de li ser siyaset, muzîk, fotokêşî, têkiliyên malbatê, civak, mîmarî, radyokarî, mafên mirovan fîlm hene. Bi temamî 21 belgefîlm hene. Belgefîlm derhênerê îranî Alî Asgarî ê bi navê “Higher than Acidic Cloud” di beşa Envivison a IDFA’yê de xelata belgefîlmê herî serketî girtibû. Dîsa belgefîlmê derhênerê ji Paraguay Juanjo Pereira ê bi navê “Under The Flags, The Sun” li Berlinaleyê Xelata FIPRESCI girtibû. Her wiha “The Man I Left Behind” li ser fotografkêş ê şer Larry Towell hatiye amadekirin. Li aliy^edin bi hevkariya ÎFSAK’ê dê panelek jî li dar bikeve û Larry Towell biaxive.
‘AMANSIZ YOL’ BI AWAYÊ NÛ TÊ
Festîval her sal fîlmekî klasîk ê tirk nû dike û nîşan dide, îsal fîlmê Omer Kavur nû kiriye. Fîlmê “Amansiz Yol” ku Kavur ligel Bariş Pirhasan senaryoya wê nivîsandibû hatiye nûkirin û dê bê nîşandayîn. Di fîlm de Kadir Înanir û Zuhal Olcay dilîzin.
"Hêvî" fîlmê metrajdirêj ê yekem ê Orhan Înce ye.
Kurtefîlmê "Morî" yê Yakup Tekintangaç li hin festîvalan xelat girtibû.
**
Nûçeyên Eleqedar:
- Nivîskar, derhêner Dag Johan Haugerud tê Festîvala Stenbolê
- Ji bo ‘Koprude Buluşmalar’ 8 proje hatin hilbijartin
- Festîvale emsar 'Amansiz Yol' restore kena
- Festîvala Fîlman a Stenbolê li benda berheman e
***
Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.