Amed
Ma Mûsîc Centerê ji bo 8'emîn salvegera xwe li Salona Çand Amedê ya li Yenîşehîra Amedê şahiyek li dar xist. Kordînatorê Ma Mûsîcê Şêrko Kanîwar li ser pêvajoyê got: “Em jî weke xizmetkarên vî gelî ji bo avakirina civaka demokratîk amade ne.”

PIRTÛKA 'REPERTUARA STRANBÊJIYÊ HAT BELAVKIRIN
Hevşaredarê Bajarê Mezin ê Amedê Dogan Hatûn û Hevşaredara Bajarê Mezin a Mêrdînê Devrîm Demîr ku qeyûm tayînî şûna wê hate kirin, parlamenterên DEM Partiyê Salîha Aydenîz û Adalet Kaya, siyasetmedar Aysel Tugluk, endam û rêveberên rêxistinên DBP'ê û DEM Partiyê yên Amedê, endam û rêveberên saziyên sivîl ên civakî û bi sedan kes beşdarî şahiyê bûn. Di şahiyê de pirtûka “Repertuara Dengbêjiyê” li hemû beşdaran wekî diyarî hate belavkirin.
Kordînatorê Ma Mûsîcê Şêrko Kanîwar di axaftina xwe de bal kişand ser banga Rêberê PKK'ê Abdulah Ocalan û agirbesta PKK'ê û wiha got: “Em wekî hunermendên vî gelî va ye herkes ya xwe dike. Em jî wekî xizmetkarên vî gelî ji bo avakirina civaka demokratîk amade ne.”

HETA NIHA 24 HEZAR PIRTÛK BELAV KIRINE
Şêrko Kanîwar da zanîn ku 24 hezar heb pirtûka “Repetuara Stranbêjiyê” belavkirine û daxwaza piştevaniyê kir. Kanîwar wisa got: “Em dixwazin bi piştevaniya we xwe bigihînin bi mîlyonan zarokan. Bi piştevaniya we em mezintir bûn, em ê bi piştevaniya we derî bi derî bigerin û xwe bigihînin zarokên Kurdistanê. Em stranên xwe biparêzin. Dê civaka me hezar salên din jî bi nasnameya xwe bijî. Lê heke stranên me werin ji bîrkirin em ê ji holê rabin.”

‘MA MUSICÊ BI 11 KESÎ DEST PÊ KIR, ÎRO BI MÎLYONAN E'
Pişt re Hevşaredara Bajarê Mezin a Mêrdînê Devrîm Demîr axivî û got: “Di demeke ku di nava kaoseke mezin de bûn tovê Ma Mûsicê hatin çandin. Bi biryardariyeke mezin bi baweriyeke xurt em komeke biçûk ketin rê. Em 11 kes bûn. Me got em vê rêwîtiya xwe li vir xalê lê daneynin. Divê ciwan bê alternatif nebûna. Armanceke me û berpirsyartiya me hebû. Di rewşeke wiha de tovê ma musicê hate çandin. Di şert û mercên gelek giran de ev rêwîtî heta îro hat. Ev tovê hatiye çandin îro bi mîlyonan belav bûye. Kesê xwe bi havênê tovê vê rêxistinê meyandibin ew di rêwîtiya xwe de serdikevin. Ma Musîc nîşaneya bîr û baweriyekê ye, encama berxwedanê ye. Saziyek hate girtin me pênc sazî vekirin.”

'BILA HER KES PEYWIRA XWE BÎNE CIH’
Devrîm Demîr, bal kişand ser pêvajoya niha û wiha berdewam kir: “Di vê pêvajoya nû ku em ê bi her awayî serbikevin de peywîr li ser mile me hemûyan e, herkes berpirsyar e û em hemû şirîkê vê pêvajoyê ne. Ji ber wê yeke heke em bixwazin sibê roja me bi serkeftinê bê tacîdarkirin divê herkes peywîra xwe baş bi cih bîne. Em ê bibin mîlyon.”
Piştî axaftinan Koma Zarokan a Ma Mûsîcê bi çepikên beşdaran derket ser dikê û ji pirtûka “Repertuara Stranbêjiyê” çend stran gotin. 
Dû re Hevserokê DBPê yê Amedê Mehmet Şirîn Gurbuz destegul da mamosteyê Ma Mûsîcê Adar Bozaner ku yek ji kesên notayên pirtûka “Repertuara Stranbêjiyê” amade kiriye. 
Hevşaredarê Bajarê Mezin ê Amedê Dogan Hatûn jî destegulek da mamosteyê Ma Mûsîcê Ramîn Rebiei ku yek ji kesên notayên pirtûka “Repertûara Stranbêjiyê” amade kiriye.
Dogan Hatûn xêrhatina siyasetmedara kurd Aysel Tugluk kir, beşdaran Tuglukê li çepikan da. Dogan Hatûn dû re qala Ma Mûsîcê kir û wiha got: “Em hêvî dikin ku bi milyonan zarokên kurd û Kurdistanî bê çand nemînin. Em ê wekî rêveberên herêmî tişta ji destê me bê bikin.”
Pişt re Koma Jin Ma derket ser dikê û stranên xwe pêşkeş kirin.
Ajansa Welat