Qamişlo
Komîna Film a Rojava bi destekdayîna hin saziyên civakî û alîkariya Yekîtiya Şaredariyan a Kantona Cizîrê ji bo bîranîna şehîdên şewata sînemaya bajarê Amûdê (1960), dest bi avakirina sînemayekê kir. Lê piştî weşandina nûçeyê, hin derdoran bi riya medyaya dijîtal gotegot dan destpêkirin. 
Li ser mijarê Cîgira Hevserokatiya Yekîtiya Şaredariyan a Kantona Cizîrê Bêrîvan Umer ji bo ANHA`yê axivî û çend xal zelal kirin.
ŞAREDARÎ Û SAZIYÊN SIVÎL BI HEV RE ÇÊDIKIN
Bêrîvan Umer da zanîn ku peymana avakirina sînemayê di navbera Komîna Film a Rojava û Şaredariya Bajarê Amûdê de hatiye îmzekirin û ev agahî parve kirin: “Saziyên çand û hunerê yên li derveyî welat wekî diyarî ev proje pêşkêş kirine. Erka şaredariyê tenê pêkanîn e, beriya qebûlkirina avakirina sînemayê bi komîn, meclis û şaredariyê re nîqaş hatine pêşxistin û hatiye erêkirin.”
DERFETÊN XIZMETA ÇANDÊ HEBE EM ÇIMA WÊ JI DEST BIDIN
Bêrîvan Umer bal kişand ser nîqaşên ku têkildarî avakirina sînemayê derketin û wiha dom kir: “Hinek dibêjin ‘li şûna avakirina sînemayê diviyabû şaredarî xebatên avê û pêwîstiyên din ji bo xelkê li bajêr pêk bîne’. Dema ji bo avakirina projeyên çandî û hunerî derfetek hebe, em naxwazin wan derfetan winda bikin. Lêçûna avakirina sînemayê ne girêdayî Rêveberiya Xweser e û ne jî ji lêçûna salane ya Şaredariya Gel e. Dê ji bo bajarê Amûdê xebatên şaredariyê di milê zift, av û hwd. de berdewam bikin.”
Bêrîvan Umer, destnîşan kir ku avakirina sînemayê wê li ser 2 qonaxan pêk were û lêçûna wê jî 346 hezar û 326 dolar e.

**

Nûçeya ELeqedar:

- Li Amûdê saloneke sînemaye tê çêkirin