AMED

Girtiyê nexweş Şakîr Turan ê 70 salî ku li Girtîgeha Tîpa L a Erzînganê dihat ragirtin, jiyana xwe ji dest da. Peyama Turan a dawî ev bû: “Ez serbilind im, min gavek jî paşve neavêt.” 

Ji bo girtiyê nexweş Şakîr Turan ku li Girtîgeha Tîpa L a Erzînganê dihat ragirtin teşhîsa penceşêra qirikê hatibû kirin û di nava 4 mehan de 23 kîloyan zeîf bû. Bi îdiaya “Alîkarî daye rêxistinê”, 6 sal cezayê hefsê li Turan ê 70 salî hatibû birîn. Turan ê li Nexweşxaneya Perwerde û Lêkolînê ya Erzînganê dihat tedawîkirin, jiyana xwe ji dest da. Zêdetirî hefteyeke bû li nexweşxaneyê dihat tedawîkirin lê agahî bi malbata wî re nehatibûn parvekirin. Kurê Turan, Abdurrahman Turan da zanîn ku girtiyan agahî bi wan re parve kiriye û li ser vê yekê di 25’ê tebaxê de çûye Erzînganê lê destûr nehatiye dayîn ku bi bavê xwe re hevdîtinê bike. 

DESTÛR NEDAN MALBATÊ

Turan, got ku hewl dan li Nexweşxaneya Perwerde û Lêkolînê ya Mengucekê ya Zanîngeha Bînalî Yildirim a Erzînganê ji bijîşkan agahiyan bigirin lê kesekî agahî bi wî re parve nekirine. Bi domdarî Turan, ev tişt anî ziman: “Bi saya hewldanên parêzeran, min di 28’ê tebaxê de bavê xwe dît. Dema nû ketî girtîgehê 75 kîlo bû. Lê dema min dîtî ketibû 40 kîloyan. Nedikariya bimeşe, bi zor û zehmet diaxiviya. Bi kursiya biteker dihat û diçû. Nedikariya pêdiviyên xwe pêk bîne. Daxwaza me ya refekatçîtiyê jî qebûl nekirin. Destûr nedan.” 

TURAN: EZ SERBILIND IM

Turan, anî ziman ku bavê wî serê vê sibehê saet di 07.30’an de canê xwe ji dest daye û wiha dom kir: “Di hevdîtina dawî de bavê min xatir xwest. Li jêrzemîna nexweşxaneyê di odeyeke bi nêm de dihat ragirtin. Bi zor û zehmetî diaxiviya. Cihê lê dihat girtin pir xirab bû. 6-7 leşker li ser serê me bûn. Piyên wî mîna cemedê bûn. Min xwest goreya wî bikim piyê wî lê destûr nedan. Wekî ku bavê min niha dê bireve, wisa li ser serê me disekiniyan. Bavê min yek bi yek xatir xwe ji me tevan xwest. Ji me re got; ‘Baş li xwe mêze bikin. Bibin yek. Ez serbilind im û min gavek jî bi paş ve neavêt'.” 

CENAZE BIRIN ATK’Ê

Cenazeyê Turan rakirin morga Saziya Tipa Edlî (ATK) ya Erzînganê û cenaze dê li navçeya Stewrê ya Mêrdînê bê definkirin.

BANG KIRIBÛ

Kurê Turan ê li Girtîgeha Tîpa L a Erzînganê dihat ragirtin di 8’ê tebaxê de bi ajansa me re axivî bû. Di axaftina xwe de diyar kir ku rewşa bavê wî roj bi roj xerabtir dibe û banga hestiyariyê kiribû. Abdurrahman Turan, hevdîtina li ser telefonê ya di 7’ê gelawêjê de bi bavê xwe re kiribû wiha vegotibû: “Rewşa wî gelek xirab e, nikare nefesê bigire û bide. Dengê wî pir kêm dihat. Got ku dema nefesê dide û distîne xwîn ji qirika wî tê. Dibin revîra girtîgehê lê tenê derziya êşbirê didin û dîsa dişînin. Nahêlin biçe nexweşxaneyê. Ji ber tenduristiya bavê min, gelek fikarên me hene. Divê tavilê bê tedawîkirin û berdan. Rewşa wî qet baş nîn e, em bifikar in. Banga min ji bo her kesî ew e ku bihestiyar tevbigerin.”  

OHD: DI 4 MEHAN DE 23 KÎLO DA

Şaxa Komeleya Hiqûqnasên ji bo Azadiyê (OHD) ya Amedê jî di 28’ê tîrmehê de çûbû serdanê û raporek amade kiribû. Di rapora xwe de wiha gotibû: “Girtî Şakîr Turan 70 salî ye û bi nexweşiya penceşêrê ketiye. Di nava 4 mehan de 23 kîloyan zeîf bûye. Ji ber nexweşiya wî divê xwarinên diyetê bidin wî lê nayên dayîn. Ji bo biçe endoskopiyê 2 mehan hatiye sekinandin, tedawiya wî nehatiye kirin, dengê wî êdî ketiye rewşeke wisa ku nayê bihîstin, nikare ji nav nivînên xwe derkeve. Malbata wî li Antalyayê dijî, 3 kur û 3 neviyên wî astengdar in lewma di hatine serdanan de zehmetî tên kişandin. Ji ber vê yekê xwestiye sewqî Antalyayê were kirn lê ev daxwaza wî nehatiye qebûlkirn. Tevî rewşa wî ya giran jî înfaza wî nehatiye taloqkirin.” 

SERLÊDAN HATE BETALKIRIN 

Kurê Turan, Abdurrahman Turan di adara 2023’yan de serî li Parlamenterê Partiya Demokratîk a Gelan (HDP) ê Kocaeliyê Omer Faruk Gergerlîoglû da. Gergerlîoglû jî bi daxwaza ku Wezîrê Dadê Bekir Bozdag bibersivîne pirsiyarnameyek da Meclisê. Lê ev pirsiyarnameyek bi hinceta “serdema qanûndanînê bi dawî bûye lewma hatiye betalkirin” û tu kirarî nehatin kirin. 

MA