Diyarname
Hikumeta Iraqê biryar dabû ku îsal 18'ê berfanbarê dê Hilbijartina Meclisa Bajaran li dar bikeve. Li ser vê yekê siyasetmedar, hevserokê berê yê YNK'ê Lahûr Şêx Cengî roja 7'ê mehê bi ser hesabê xwe yê tora civakî re peyamek belav kir û bal kişand ser meseleyê.
Cengî diyar kir ku piştî demek dirêj ev hilbijartineke dîrokî ye û got, "Li herêmên nakok ji bo kurd statuya xwe nîşan bidin û xwedî li rastî û axa xwe derên ev hilbijartin girîng in"
Va ne ji gotinên Cengî çend not:
- Li Kerkûkê û herêmên nakok daxwaza gelê me bi yek lîsteyê ketina hilbijartinê ye. Ji bo vê emê xebatê bikin. Bêyî berjewendiyên şexsî, ji bo serketina kurdan û ji bo kurd kursiyên xwe li Meclisa Kerkûkê biparêzin me hewldan da dest pê kirin û me projeya Hevpeymana Gel pêşkêş kir.
'PARTIYÊN SIYASÎ BERSIVA ERÊNÎ NEDAN'
- Em çûn serdana gelek partiyan, me projeya xwe şand, fikra wan pirsî. Armanc serketina kurdan bû, lê mixabin partiyên siyayî bersiva erênî nedan me.
- Mixabin di serî de partiya li desthilatdarî, beşek mezin ji partiyên siyasî yên Kurdistanê ji xetayên paşerojê ders negirtine. Dixwazin Kerkûkê û herêmên bi nakok bikin qurbanê berjewendeyiên xwe yên siyasî û berjewendiyên xwe yên herêmî.
- Derket holê ku ew diruşmên wan ên kurd û welatperwerî ne ji bo gel in. Ew ji bo Kerkûk û herêmên bi nakok êdî barekî giran in. Hatine wê astê ku ev têkoşîna bûye sedema bi hezaran şehîdan dikin wekî qurbanê lîstikên hundir û derve.
'JI BO ÇEND KURSIYAN EM NAXWAZIN ZIRARÊ BIDIN KURDAN'
- Ligel ku zordarî li ser me heye ku em bi lîsteyeke cuda bikevin hilbijartinê jî, ji bo çend kurksiyan em naxwazin zerarê bidin dengê kurdan. Rewşa û giraniya me ya li Kerkûkê tê zanîn. Ger di bin yek lîsteya kurdan de nebe jî emê bi awayekî cuda beşdarî hilbijartinan bibin.
- Bi vê peyamê em ji bo gelê Kerkûkê û herêmên nakok dibêjin ku em di xizmeta wan de ne. Di paşeroje de jî, niha û pêşerojê de jî armanca me nîn e em bi qedera Kerkûk û herêmên nakok bilîzin. Loma emê hemû fedekariyê bikin.
'EZÊ MAL BI MAL BIGERIM'
- Di vê hilbijartina ku qederê diyar dike de çi ji destê me bê emê bikin. Ezê li Kerkûk û hemû herêmên bi nakok mam bi mal, gund bi gund bigerim, destê hilbijêrên kurd maç bikim û bibêjim bi ew diruşmeyên derew ku bilid dikin bawer nekin. Ezê ji wan bixwazim ku beşdarî hilbijartinê bibin ku ji bo qedera Kerkûkê bila dengek kurd jî vala neçe.
- Ezê ji wan bixwazim ku ew, endamên kîjan partiyê dibin bila bibin, bila dengê xwe bidin berendamên dirust, ên ku dê ji bo herêmê xizmetê bikin.
- Ji bo gelê Kurdistanê carek din vê dibêjim, di pêşerojê de çi biqewime ev berpirsiyar ew kes in ku li ser Kerkûkê û herêmê xeman naxwin in. Divê bizanibin ku dîrok dê wan efû neke û dadgeha dîrokê dê wan bidarizîne.