ENQERE

Ozan Alpkaya di sala 2008'an de li Amedê hatiye girtin û niha li Girtîgeha Hejmar 1 a Sîncana Enqereya Tirkiyeyê girtî ye. Ji wê rojê ve heta niha 17 pirtûkên bi kurdî ku ji bo wî hatine şandin, rayeradên girtîgehê nedane wî. Li ser vê Alpkaya pêşî serî li AYM'ê (Dadgeha Zagona Bingehîn) a Tirkiyeyê da. Piştî ku AYM'ê daxwaz red kir, vê carê wî serî li Dadgeha Mafên Mirovan a Ewropayê (DMME) da.

'HEQÊ WERGERANDINÊ DIXWAZIN'

Li ser vê yekê ji Ajansa Mezopotamyayê (MA) Hakan Yalçin nûçeyeke amade kiriye. Li gor nûçeyê nivîskar Ozan Alpkaya di sala 2008'an de li Amedê hatiye girtin û 29 sal ceza lê hat birîn û nêzî 2 sal in jî di Girtîgeha Sîncanê de ye.

Alpkaya bi rêya malbata xwe pirsên MA'yê bersivandine  û gotiye: "Me û rêveberiya girtîgehê gelek caran ev mijar nîqaş kiriye. Çend meh berê, gava me ji wan pirsî 'çima hûn pirtûkên bi kurdî nadin?', nikaribûn bersivê bidin. Di van rojên dawî de gava min car din ji wan dipirsî, digotin 'Komîsyona Perwerdehiyê ya Girtîgehê tenê dikare pirtûkên bi tirkî kontrol bike.' Ger hûn bixwazin pirtûkên kurdî yên ji were tên şandin bigihêjin ber destê we, divê hûn di daxwaznameya ewil de binivîsin ku ez wergêr dixwazim. Di daxwaznameya diduyan de jî hûn bibêjin gava pirtûkên ji min re hatine şandin, hatin xwendin û ji aliyê wergêr ve hatin wergerandin, ez dixwazim heqê wergêr ji hesabê min bê birîn.' Dibêjin ji xeynî vê em nikarin pirtûkan bidin we." 

SERÎ LI DMME'YÊ DA

Alpkaya ragihand ku ji ber vê serî li Dadgeha Mafên Mirovan a Ewropayê (DMME) daye û wiha domand: "Ji ber vê bêhiqûqîtiyê min serî li Dadgeha Destûra Bingehîn (AYM) da. AYM'ê biryara redkirinê da. Vê carê me serî li DMME'yê da. Berê jî heman tişt li girtîgehên din hatibû serê girtiyan û serî li DMME'yê dabûn. DMME'yê vê yekê wekî binpêkirina mafan hesibandibû." 

Alpkaya destnîşan kir ku rêveberiya girtîgehê bi pêkanînên bi vî rengî dixwaze astengiyan deyne ber kurdî û got ku ew ê jî di vî warî de serî li hemû rêyên hiqûqî bidin. 

GIRTÎGEH: BILA SERLÊDANA SÛC BIKIN 

Têkildarî mijarê em li girtîgehê geriyan. Rayedarên girtîgehê wiha gotin: “Ji bo ku pirtûkên ji girtiyan re hatine em bikarin bidin girtiyan, divê Lijneya Rêveberiyê ya Girtîgehê erê bike. Em li gorî keyfa xwe wiha tevnagerin. Girtî bila têkildarî vê mijarê serlêdana sûc bikin.”