Diyarname
Romana nû a Omer Dilsoz bi navê "Berbiska Zer", ji Weşanên Avestayê derket.

Nivîskar Omer Dilsoz ku berê bi sê romanan derketibû pêşberî xwendevanan vê carê romana xwe ya bi navê "Berbiska Zer" dagihand ber destê xwendevanan.
Roman ji sê pencereyan pêk tê; di ya ewil de serpêhatiya Sînema parêzer û hevalên wê heye. Di ya duyem de, Sînema piçûk û Berjenê berxvan û tiştên li dora wan diqewimin ji xwe re dike mijar û di pencereya sêyem de, komeke kontra tê çiyayê Bestanê, komek gerîlayên çavdêr li wê derê ne, rageşiya navberê tê vegotin.
        
Ev kitêb, bi kurtî hewl dide demeke tarî ya Kurdistanê bide ber ronahiyê û hewl dide paşperdeya bûyerên tarî ku tenê em ji nûçeyên êvarê, bi fesla çend çirkeyan guh lê dibin, xwestiye dest deyne ser. Roman ji nûçeyekê dest pê dike û bi ser wê xwendevan dibe piştperdeya ku di nûçeyê de nayê gotin lê mimkûn e pêk hatibe.
Di vê romanê de, mafê gotinê ji bo hemû aliyên bûyerê; hemû aliyên şer û yên ku pişt re li ser bermahiyên şer hewl didin 'gunehên şer' ronî bikin, terxan dike û guhê xwe dide 'serpêhatî; dubendî, hatûçûyînên derûnî û ruhî' yên her du aliyên şer ên kirde û lêqewmiyan.

OMER DILSOZ KÎ YE?
Niviskar Omer Dilsoz di sala 1978’an de li gundê Gûzereşa Culemêrgê hatiye dinyayê. Di salên xwendina li Culemêrgê de dest bi nivîsîna kurdî kiriye. Heta niha bi navê Hêviyên Birîndar, Bêhna Axê û Neynika Dilî sê romanên wî heta niha  û her wiha dîwaneke wî ya helbestan bi navê Bila Gotineke Min û Te jî Hebe derketiye.
Dilsoz, niha li Diyarbekrê dijî û bi karê edebiyatê re mijûl e.

Berbiska Zer / Omer Dilsoz /  Roman  / 256 rûpel