Diyarname
Hevserokê berê yê HDP'ê Selahattin Demirtaş li ser destdana ser vîna gelê Wanê peyamek belav kir. Demirtaş pêşî got ku ez we hemûyan hembêz dikim, silav û hezkirinên xwe yên ji dil dişînim û wisa dewam kir, "Di serî de gelê Wanê û hemû gelê me, ji ber we vîna xwe nîşan da, ji bo serketina we ya di hilbijartinê de ez we ji dil pîroz dikim. Ji ber ku we rûmet da me, we serê me bilind kir, ez hezar carî sipasiya we dikim. Ez sipasiya hemû gelê me, kedkarên partî û Hevşaredarên me Abdullah Zeydan û Neshilan Şedalê dikim, serketinê dixwazim. Gelê me hucreya me ronî kiriye, bi israra azadiyê rêya siyasî ya pêşerojê çêkiriye. Lê wisa diyar e kesên hê hurmetê nîşanî vîna gel nadin, ji deh salên borî ders negirtine hene. Em ligel hemû bêhiqûqiyê dikin rêya diyalogê, aştiyê vekin, hinek bi israr provakasyonê çêdikin."
Demîrtaşî bang li Serokomarê Tirkiyeyê kir û got, "Êvara hilbijartinê we gotibû emê hurmetê nîşanî vîna gel bidin û we gotibû me peyam girtiye. Tiştê li Wanê têne jiyîn ne li gor ev gotinên we ye mixabin. Vê yekê gel jî Heq jî qebûl nake. Em li bendê ne hê di serî de hûn pêşî li vê yekê bigirin."
Selahattin Demirtaşî bang li gelê Wanê, hemû raya giştî, alîgirên demokrasiyê, partiyên siyasî kir ku dijî vê bêhiqûqiyê derên û got, "Dem ne dema pevçûnan e, dema avakirina aştiyê ye. Hemû siyasetmedar û rêveberên welat bi rê ve dibin divê dengê gelê kurd bibihîzin. Li hemberî zordariyê gelê me dê heta dawî xwedî li vîna xwe derê. Di serî de ji bo gelê me yê Wanê, ji bo hemû gelê me em daxwazên xwe yên piştgiriyê dişînin, silavên gel û hezkirinên xwe dişînin û bi hêviya hevdîtina di rojên azad de... An serketin an serketin."
***
Nûçeyên Eleqedar:
- DEM Partî: Emê li YSK'ê îtîrazê bikin
- Serokê TÎP'ê Baş ji bo Zeydan diçe Wanê
- Serokê CHP'ê Ozel: Ev tunehesibandina vîna gelê Wanê ye
- Lijneya Hilbijartinê mazbata da berendamê AKP'ê
- Meseleya Şaredar Zeydan: Çi qewimî bû, çawa bû?
- Turkdogan: Çi leza we heye, hê biryareke teqez jî li holê tune ye