Diyarname
Her kesê ku li ser rûyê dinê dijî dinya wî eleqedar dike. Her kes bi awayekî erênî yan neyînî bandorê li dinyayê dike. Kî meraq dike ku rojekê li dinyayê çawa derbas dibe? Ji bo yên ku meraqa wan li ser dinyayê ye û ji bo temaşe bikin ku li gelek welatên dinyayê rojeke çawa derbas dibe roja 22.04.2012'yan li çalakiyan bûn.
Çalakiya ku bi navê "One Day On Earth" (Rojek li ser rûyê dinê) li 160 welatan bi hev re heman rojî li dar ket. Di van çalakiyan de belgefîlmekî bi heman navî hat nîşandayîn. Belgefîlmê ku ji du saetan pêk dihat ji dîmenên rojeke ku li gelek welatên dinyayê hatibûn şandin pêk hatibû.

Rojek û 3 hezar saet dîmen

Di 10.10.2010'an de (10.10.10) ji çar aliyên dinyayê mirovan dîmen kişandibûn û ji bo belgefîlm, ji kesên ev proje dabûn dest pê kirin re şandibûn.
Ji Angola heta Koreya Bakur, ji DYA, Îngilistan, heta Îtalya, Kurdistan, ji Endonezya heta Lubnan, Îran û bi dehan welatên din, bi sedan, bi hezaran dîmenên ku bi giştî 3 hezar saet dîmen dikir ji amadekarên projeyê re hatibûn şandin. Wan jî ji van 3 hezar saet dîmenî belgefîlmekî 104 deqîqeyî amade kir û belgefîlm yekem car bi hev re li 160 welatan derket pêşberî temaşevanan.
Di belgefîlm de ji rojbûna kesan, heta zewacê, ji şeran heta parastina xwezayê, heta parastina çandê gelek mijar hatibûn rêzkirin.
Çalakiya "One Day On Earth" li Tirkiyeyê li Stenbolê li dar ket. Di çalakiya ku li Santral İstanbulê li dar ket de pêşî Bariş İçin Çocuk Orkestrasi, Hayat Meyal, Ozgur Demir û koma wî derketin ser dikê û stran gotin. Dûre belgefîlm hat nîşandayîn.

Ji fîlm çend kurte

Û belgefîlmî gelek agahiyên li ser "Di 10.10.10 de rewş wiha bû" pêşkêş kirin. Mînak digot;
- Wê rojê li ser rûyê dinê 1300 cure muzîk hebûn.
- Ji 8 mîlyonî zêdetir cureyên giyanewer hebûn.
- 1,3 mîlyar kes ji ava paqij a vexwarinê mehrûm bû.
- 10 mîlyon kes di hepsê de bûn.
- Li 45 welatan pevçûnên leşkerî hebûn.
- 154 hezar kes hatin dinê. Û gelek agahiyên din.

Ji kurdan heta Dalay Lama

Ji kurdan heta rêberekî olî Dalay Lema, ji îraniyek, heta kesên çûne fezayê gelek kesî gotinên xwe digotin. Helbet her kesî bi zimanê xwe.
Kurdekî ji Başûr ku lingekî wî di encama teqîna mayînekê de qetiya bû li ser rewşa xwe disekinî. Îraniyekî ji bo vê vîdyoyê sipasî dikir ku wan ew kişandiye, dibe ku hinên din ji rewşa wî ji xwe re dersekê bigirin.
Û rêberekî olî Dalay Lama wisa digot: "Ji bo aştiyê dia tenê têrê nakin. Ger têrê bikara ev sê çar hezar sal in mirov diayan dikin dê têrê bikara. Dia tenê têrê nakin, ji bo aştiyê divê mirov tişteke din bike, bikeve nava tevgerê."
Her wiha belgefîlm li ser zirara ku mirov didin dinyayê jî wisa gotina xwe dianî ziman: "Pêdiviya dinyayê bi me tune ye, pêdiviya me bi dinyayê heye."

***

Nûçeya eleqedar:

- 'Li ser rûyê dinê rojek' li benda temaşekirinê ye