Diyarname

Kovara moda, xweşikî, çand û jiyanê li gelek welatan weşanê dike. Versiyona wê ya Filipînê jinek 106 salî xist berga xwe ya meha avrêlê.

Kovarê mambabatokek (deqsazet) 106 salî ya bi navê Apo Wang-Od xiste berga xwe. Kovarê bi sernavê "Apo Whang-Od û Şopa Nasmeya Filipînê yê Winda Nabe" ev mijar girtiye dest û wisa gotiye, "Bi saya nifşên ku Apo Wang-Odê ew perwerde kirine û îlham dane wan, dê pratîka batokê ya hezar salî li Buscalanê û li dinyayê bijî."

Ev kirina ku kurd jêre "deq" dibêjin li wê derê navê "Batok" lê ye û kesên vî karî dikin re jî "Mambabatok" dibêjin.

Kovara modayê Vogue ku wekî kovara herî girîng a modayê tê zanîn, bi rêya mambabatokek berê xwe daye vê batokê. Bi vê yekê kovarê berê estetîkê û xweşikiyê daye aliyeke din.

Dîroka Vogue

Kovara Vogue di sala 1892'yan de li New Yorkê dest bi weşanê kiriye. Hê jî weşana xwe didomîne. Li her welatî edîsyonên wê yên cuda hene.