Hêvîdar XALID

Ji mehan ve êrişên bi gazên jehrê li dijî rojhilatê Kurdistanê û tevahî Îranê têne kirin. Hema bêje rojane xwendekarên keç tên jehrîkirin. Di encamê de bi dehan ji wan jiyana xwe ji dest dan. Eger ev diyardeya dewam bike dibe ku rewşa li welat ji bin kontrolê derkeve û bi girêktir bibe. Her wiha xwepêşandanên gel ên li dijî dewletê ku ji piştî qetilkirina Jîna Emînî de dest pê kirine berfirehtir dibin.

Di demekê de ku serhildana li Îran û rojhilatê Kurdistanê ya ku bi qetilkirina Jîna Emînî re dest pê kir, dikevin meha xwe ya ʹan, pirsa jehrîkirina xwendekarên keç li dibistanên Îranê bi xurtî xwe dide der.

Her çiqasî ku li hememberî vê diyardeya biêş bertekên tund ên herêmî, navneteweyî û navxweyî tên nîşandan, lê heta niha aliyên têkildar ên dewleta Îranê tu bersiv nedaye. Gelek çavdêrên rewşa Îranê texmîn dikin ku dewleta Îranê bi xwe li pey jehrîkirina xwendekarên keç e ku tevî êrîş, darvekirin û zextên dewletê roleke xurt û bi bandor di serhildanê de dilîzîn û pêşengiyê jê re dikin.

Belê desthilata dewleta Îranê li pey jehrîkirina xwendekarên keç e. Ji ber ku xwendekarên keç banga mafên xwe yên xwezayê dikin û roleke sereke di çêkirina guhertinên rasteqîn û radîkal de dilîzin. Her wiha roleke çalak di vê pêvajoya dîrokî, çarenûsî ya hestiyar de dilîzin. Xwendekarên keç çîna herî bi hêz a birêxistinkirina xwepêşandanan û belavkirina wan e. Ji ber vê yekê desthilat hemû cureyên pişaftin, tundî û zilmê li wan dimeşîne.

Li Îranê xwendekarên keç hêza herî dînamîk a afirandina jiyaneke adilane û rêzdarî ne. Ji wê zêdetir ji xwepêşandanan re pêşengiyê dikin da ku mafên jinan ên ku ji sedên salan ve hatine çewsandin vegerînin. Ji ber vê yekê rejîma Îranê ji îradeya jinan û hêza rêxistinî ya li gel xwendekarên keç ditirse û wekî kabûs û xetereyeke li ser siyasetên xwe yên dermirovî dibîne.

Ev hemû îsbat dikin ku destê rejîma Îranê di jehrîkirina xwendekaran de heye. Wekî her carê rejîma Îranê bi hemû rê û rêbazên erzan hewl dide ji vekirina vê dosyayê bireve û bide xuyakirin ku destên derve di van bûyerê de hene û ji stûyê xwe derxe.

Jehrîkirina xwendekarên keç bi vî rêbazî li dijî hemû nirx û pîvanên mirovî ye. Mijareke gelekî bi êş e ku laşê zarokên gelê xwe jehr bike û kesên din bi vî sûcê tawanbar bike. Ev sûc bi xwe ye. Ev hewldanên ji aliyê desthilatê ve têne kirin ji bo tolhilanîna ji civaka ku banga azadiya jinan dike. Desthilatdar rêbazên tirsê û qetilkirinê bi kar tîne da ku civakê bêdeng bike û şoreşa rûmetê ya "Jin, Jiyan, Azadî" ya li ku tevahî cîhanê deng veda tune bike.

Ev binpêkirin û kiyarên li dijî xwendekarên keç nikare îrade û îsrara jinan Îranê yên ku bi jiyana azad bawer dikin, bişkîne. Lê belê hêza wan a li hemberî hemû siyasetên ku di serî de jinên têkoşer ên birêxistinkirî yên berxwedêr dikin hedef, xurtir dike. Bila her kes bizanibin ku şoreşa kurdî ya Jîna Emînî xwedî nîşane û taybetmendî û cîhanê ye. Şoreşa "Jin, Jiyan, Azadî" ya ku bi rihê jinên ciwan gûr bûye venamire, wê ebedî bimîne heta ku li her cihî û di her zemanî de bibe şoreşa tevahî jinên têkoşer ên serhildêr.

ANHA