Li bajarên Bakur, Başûr û li hin bajarên Tirkiyeyê “Şeva Yelda”yê hat pîrozkirin. Gelek kes beşdarî pîrozbahiyê bûn û çanda kurdî ya dîrokî zindî kirin.

Şeva Yelda ku wekî şeva herî dirêj a salê hatiye binavkirin, li nav dîroka kurdan xwedî cihek girîng e. Şeva Yelda wekî yek ji cejnên neteweyî ya kurdan tê hesibandin. Îsal li gelek bajaran ev şev hat pîrozkirin. Va ne hin ajahî ji van pîrozbahiyan:

AMED

Li Komeleya Çand û Hunerê ya Dîcleyhe bi organîzekirina saziyên kurdî Şeva Yeldayê hat lidar xistin. Di şevê de fîlm hat nîşandayîn, pêşbazî li dar ket. Dûre Dengbêj Sadiq Farqînî klam gotin.  Di pêşbaziyê de kesên bi ser ketin bi sêva mêxekrêj û pirtûkan hatin xelatkirin.

BATMAN

Li Batmanê li Salona Konferansê ya Baroya Batmanê şahî hat lidar xistin. Komeleyên çandî, rêveber û endamên TJA, HDP, BDP û Dayikên Aştiyê beşdarî şahiyhe bûn. Nivîskar Muhsin Ozdemîr li ser girîngiya şevê axivî û got, “Ev cejn parçeyeke çanda me ye. Di wateya destpêka ronahiyê de ye.”

Di şevê de sînevîzyon hat nîşandayîn, helbest hatin xwendin û dengbêjan klam gotin. Dûre ARÎ-DER’ê sertîfîka da 30 kursiyên perwerdehiya xwe ya kurdî temam kirin.

WAN

Li ŞanoWan a li Wanê şe hat li dar xistin. Beşdaran kincên gelêrî li xwe kirin. Di şevê de Dengbêj Meryem, Dengbê Apê Ûsiv klam gotin, ji Jineolojiyê Neslihan Şedal û nivîskar Heval Dilbihar helbest xwend. Şev bi gerandina govendê bi dawî bû.

QELADIZÊ

Li Qeladizê li Peymangeha Kompûtêr ay Qeladizê ji bo Şeva Yelda çalakiyên hunerî li dar ketin. 

SORAN

Ji bo Şeva Yelda, li Îdareya Soran ciwan, rewşenbîr, hunermend, helbestvan tevî jinan li hev kombûn û heya derengiya şevê bi çalakiyên hunerê Şeva Yelda pîroz kirin. Li Hola Ferhenga Şîn ya li navenda Hunerî û Rewşenbîrî ya Soran şev hat lidar xistin.

Derbarê mijarê de Soran Xalid ji bo Rojnewsê wisa gotiye; “Navenda Ferheng ya Şîn wekî kevneşopiyek her sal ji bo vê şevê çalakiyan lidardixe. Bi çalakiyên hunerî yên cur bi cur ev şev tê pîrozkirin. Ciwan, helbestvan, hunermend li hev kom dibin û bi hev re şevek xweş derbaz dikin.”

ÎZMÎR

Li Rêxistina HDP’ya Bajêr a Îzmîrê çalakiya Şeva Yelda hat lidar xistin. Sînevîzyon hat nîşandayîn, dengbêjan klam gotin. Gelek kes beşdar bûn.

EDENE

Li Rêxistina HDP’ya Bajêr a Edeneyê bi beşdariya mebûsên HDP’ê Ayşe Surucu, Tulay Hatimogullari û gelek kesên din Şeva Yeldayê hat pîrozkirin.  Li ser maseya ji bo çalakiyê hate danîn mûm hatin pêxistin, sêv danîn ser maseyê. Sînevîzyona li ser şevê hat nîşandayîn. Klam hatin gotin. 

Wekî notek: Ji saziyên kurdan Kovara Destar, Komeleya Lêkolînên Ziman û Çandên Mezopotamyayê (MED-DER), Enstîtuya Kurdî ya Stenbolê, Enstîtuya Kurdî ya Amedê, Komeleya Lêkolînên Ziman û Çandên Arî, Komeleya Wêjekarên Kurd, Komeleya Lêkolînên Çand û Ziman a Arsîsayê, Komeleya Lêkolînên Ziman û Çandên Botanê, Komeleya Lêkolînên Çand û Ziman a Avestayê, Komeleya Lêkolînên Çand û Ziman a Ankayê, Komeleya Lêkolînên Çand û Ziman a Feradê, Komeleya Lêkolînên Çand û Ziman a Birca Belekê, Komeleya Çand û Hunerê ya Dîcleyê, Navenda Çandê ya Biharê, Enstîtuya Kurdî ya Stockholmê, Enstîtuya Kurdî ya Almanyayê, Enstîtuya Kurdî ya Brukselê, Enstîtuya Kurdî ya Swîsreyê û rêxistinên HDP'ê ji bo pîrozbahiya Şeva Yelda pêşengî kirin. 

Diyarname, MA, Rojnews

***
Nûçeya Eleqedar:

- 'NOEL ji Şeva Yeldayê hatiye girtin'