Diyarname
Ne yek didu, ne sed û hezar, tam bi temamî 16 hezar kes hatine binçavkirin. Dema bên serhev bi qasî hejmara bajarekî dikin. Jê 5 hezar kes hatine girtin û avêtine hepsê. Dema ev hejmar bê serhev bi qasî navçeyeke dike.
Em qala HDP’ê dikin. Agahî ji aliyê Berdevkê Komîsyona Mafên Mirovan û Hiqûqê yê HDP’ê Serhat Eren ve hat belavkirin. Eren li ser 10’ê Berfanbarê Roja Mafên Mirovan daxuyanî belav kir û got, “Yên ku hurmetê nîşanî mafên mirovan ên bingehîn didin, yênn ku ji bo vê yekê têdikoşin û ber xwe didin, Roja Mafên Mirovan a van kesan pîroz be.”
Eren gotin anî ser Tirkiyeyê, got ku mixabin li Tirkiyeyê di warê mafên mirovan de binpêkirinên giran têne jiyîn û got, “Ji sala 2015’an ve desthilatdariya AKP-MHP’ê li Tirkiyeyê mafên bingehîn ên mirovan asteng kirine. Bi çalakiyên nijadperest û mîlîtarîst li hemberî kurdan konsepta şer dane dest pê kirin û di navbera salên 2015-2022’yan de bi dehan kesî ji ber vê canê xwe ji dest dane, bi hezaran birîndar bûne û bi sed hezaran ji cih û warê xwe bûne.”
Eren qala êrîşên dewletê yên li ser Bakur û Rojhilatê Sûriyeyê kir, diyar kir ku di van êrîşan de di serî de zarok gelek kesî canê xwe ji dest dane. Eren li ser birpêkirina mafên girtiyan, mafê azadiya ramanê, girtina rojnamegeran kir û gotin anî ser girtina HDP’yiyan. Eren wisa got, “Ji 24’ê tîrmeha 2015’an ve li hemberî partiya me operasyonên komkujiya siyasî pêk hatin. Heta niha 16 hezar kes hatin binçavkirin, hevserokên me yên berê, mebûs, serokê bajar û navçeyên me û endamên me jî têde 5 hezar kes hatine girtin û ew avêtine hepsê. Tenê di 10 mehên pêşî ên sala 2022’yan de 2466 rêveber û endamên me hatine binçvkirin. Sedema binçavkirinê jî beşdariya daxuyaniya çapemeniyê, xebatên partiya siysaî, beşdariya Newrozê û hwd. in. Dîsa ji sala 2015’an ve 340 caran bi awayekî fîzîkî êrîşê rêxistinên me yên bajar û navçeyan, stand, mîtîng û çalakiyên me kirine. Rêvehala me Deniz Poyraz di van êrîşan de hatiye kuştin, geyek hevalên me birîndar bûne.”
Berdevkê Komîsyona Mafên Mirovan û Hiqûqê yê HDP’ê Serhat Eren ji bo 10'ê Berfanbarê Roja Mafên Mirovan daxuyanî belav kir.