Diyarname

Li ser van her du herêmên xweser daxwaz û pevçûna du welatan heye û niha her du dê li nava xwe refrandûmê saz bikin. Em qala herêmên xweser Donetsk û Luhaskê dikin. Li her du cihan di navbera rojên 23-27’ê vê mehê de dê referandûm çêbe û gel dê bersivê bide ka beşdarî Rusyayê bibin an na.

Li herêma Donbas a Ûkraynayê du cih hene: Luhansk û Donetsk. Her du herêman serxwebûna xwe ragihandibû. Rusyayê ev yek qebûl kiribû, Ûkrayna dijî vê yekê derketibû û Ûkrayna hê jî her du herêman wekî ya xwe dihesibîne. Lê niha konseya gel a her du herêman jî biryara sazkirina referandûmê da. 

Li ser vê yekê Wezîrê Karên Derve yê Rusyayê Sergey Lavrov daxuyaniyeke belav kir û got, “Ji roja operasyona leşkerî ya taybet dest pê kiriye û berî wê jî me got gel divê bi serê xwe qedera xwe tayîn bikin. Rewşa niha nîşan dide ku ev gel dixwaze bibe efendiyê xwe bi xwe.”

Piraniya gelê li van herêman dijîn rus in. Van her du herêman di sala 2014’an de bi navê Komara Gel a Donetsk û Komara Gel a Luhanskê ava kiribû. Par roja 21’ê reşemiyê Serokdewletê Rusyayê li Qesra Kremlînê peymana naskirina her du herêman wekî welatên serbixwe îmze kiribû. Piştî vê yekê roja 24’ê reşemiya 2021’ê Rusyayê bi îdîaya “Ji bo em gelê li Donbasê biparêzin em dest bi operasyoneke taybet a leşkerî dikin” dest bi şerê li hemberî Ûkraynayê kiribû. Ji wê rojê de şer di navbera Ûkrayna û Rusyayê de didome.

Û niha jî her du herêman biryar da ku ji bo beşdarî Rusyayê bibin an na referandûmê saz bikin. Lê ji niha de Dewletê Yekbûyî yên Amerîkayê (DYA) ragihand ku ew dê vê qaşo referandûmê nenasin.