Diyarname

Îro di Lîga Supar a Jinan a Fûtbolê ya Tirkiyeyê de maça tîma jinan a Amed Spor û Fenerbahçe Sporê hebû. Maç li Amedê dihat lîstin. Di maçê de Fenerbahçe bi 2-1 li pêş bû. Di deqîqeyên zêdek de dema lîstikvana Fenerbahçeyê taç bikar dianî ji trîbunek tiştek hat avêtin û li nav sehayê xirecir derket. Lîstikvan bi hev ketin û maç hat rawestandin.

Di vê xirecirê de lîstikvana Fenerbahçeyê Goksu Gokçe birîndar bû. Lîstikvanên Fenerbahçe û heyeta tîmê di bin çavdêriya ewlehiyê de ji sehayê hatin derxistin.
6 QERTÊN SOR NÎŞAN DAN

Hakêm ligel teknîk dîrektorên her du tîman, 6 qertên sor nîşan dan. Ji van 3 qertên sor nîşanî lîstikvanên tîma Amed Sporê, 3 jî nîşanî yên Fenerbahçe Sporê dan. Hakêm piştî ku qertên sor nîşan dan, maç xilas kir û ji sehayê derket derve.

‘ANTRENORÊ TÎMA HEMBER ÇÊR KIRIN’

Serokê Duyem ê Amed Sporê Cahit Akin li ser meseleya îro daxuyaniyeke nivîskî weşand û got ku tiştên îro qewimîne ne ji me qewimîne, li gor me ziman, bawerî, reng çi dibe bila bibe hemû jin pîroz in.

Akin wisa dom kir, “Antrenorê mêr ê tîmê reqîb çêrên xirab kirine. Em vê qebûl nakin û emê qebûl nekin jî. Li aliyê din ji roja roj de heta niha biryarên şaş ên hakêman in. Sedema ku bûyer mezin bûne tevgerên dehfdanê ên tîma hember û biryarên şaş ên hakêm in. Ji vir em bang li TFF û Lijneya Hakêman dikin. Dest ji feraseta ku Amed Sporê def dide, xirab nîşan dide, tune dihesibîne berdin.”

Li aliyê din Akin got ku Amed Spor dê dest ji helwesta xwe ya heyî bernede.