STENBOL
Dadgehê bi hêceta klîbên stranan û parvekirinên medya dîjîtal 3 sal û mehek û nîv cezayê hepsê li hunermend Hozan Canê birî.
Bi îdiaya “endamtiya rêxistinê”, “propaganda rêxistinê kiriye” û “alîkariya rêxistinê kiriye” doz li Hozan Canê hatibû vekirin. Rûniştina biryara dozê li 3’yemîn Dadgeha Cezayê Giran a Bajarê Edîrneyê hat lidarxistin. Hozan Canê beşdarî dozê nebû û parêzerên wê Newroz Akalan û Mustafa Pekoz lê amade bûn
Dozger mutalaya xwe pêşkêşî dadger kir û got derbarê îdiaya “endamtiya rêxistinê” delîl nehatine dîtin. Dozger xwest bi îdiayên “propaganda rêxistinê” ya ji ber parvekirinên medya dîjîtal û klîbên stranan û “alîkarî daye rêxistinê” Hozan Canê were cezakirin.
Parêzeran diyar kir ku miwekîla wan sûc nekiriye û parvekirin û klîbên wê di çarçoveya xebatên wê yên hunerî de ne û xwestin were beraetkirin.
Piştî parastina parêzeran dadgehê biryara xwe eşkere kir û bi îdiaya “alîkarî daye rêxistinê” û “propaganda rêxistinê kiriye” 3 sal û mehek û nîv ceza li Hozan Canê birî. Çi qewimî bû? Hunermend Hozan Canê roja 22'yê pûşpera 2018'an de beşdarî xebata hilbijartinê ya HDP'ê bûbû û wê çaxê hatibû binçavkirin, 26'ê mehê jî hatibû tewqîfkirin. Ew piştî du salên li girtîgehê roja 30'ê rezbera 2020'î hatibû berdan. Piştî berdana wê doz berdewam dikir û îro bi dawî bû.