AMED

Parlementera Amedê Leyla Zana derbarê konsepta di van demên dawiyê de li dijî Kurdan tê meşandin de ji Serokê DYE’yê Barrack Obama, Sekreterê Giştî yê NATO’yê Anders Fogh Rasmussen, Sekreterê Giştî yê NY’yê Ban Ki-Mûn, Serokê Parlementoya Ewrûpa Jerzy Buzek- Serokê Konseya Ewrûpa Herman Van Rompuy û Serokkomarê Tirkiyeyê Abdullah Gul re name şand.

Li aliyekê êrişa hewayî ya artêşa Tirk a li ser Başûrê Kurdistanê berdewam dike, li aliyê din Parlementera Amedê Leyla Zana ji rêberên cîhanê re name şand û bêdengiya wan a li hemberî van êrişan rexne kir.

Nameya Zana wiha ye:

''Weke tê zanîn li ser xaka Mezopotamyayê gelek çand, bawerî û gelên cûda bi hev re jiyane. Yek ji wan gelên kevnar Kurd in û malovanî ji hemû rengîniya çandî, etnîkî û baweriyan re kiriye û tu carî ji ber bawerî an jî zimanên cûda zordariyê li tu kesekî nekiriye. Her çendî li rastî hemû neheqiyên dîrokî hatibin jî, sebir û hebûna xwe parastiye, nîşan daye ku neteweyek mazlûm e.

Li cîhanê guhertin û veguhertinê pir lezgîn diqewimin. Rojhilat Navîn malovanî ji pêşketinên nû re dike, gelê me yê ku ji rastiya xwe ya dîrokî mehrûm mayî, hê jî nefes bi nefes û bi berdêla mirinê tekoşîna xwe ya ji bo azadiyê dimeşîne.

Her çendî wisa bixuyê ku beşek ji pirsgirêkê çareser bûye jî, lê ji bo Kurdên Iraqê negihin statûyek siyasî, aşkere ye ku Tirkiye, Îran û Sûriye di nava yekgirtinek mezin de ne. Dema behsa Kurdan û statûya siyasî tê kirin, binpêkirinên maf û sînoran, bê ku bibêjin jin, zarok, zilam, pîr an jî kal, xanî û gund têne bombebarankirin, her wiha li hemberî operasyonên dersînor û êrişên hewayî, rayagiştî ya cîhanê bê deng e û li hemberî van sucên mirovahiyê bê deng dimînin û hema bibêje çavê xwe lê digirin, ev yek ji aliyê gelê me ve bi awayeke matmayî tê pêşwazîkirin. Di heman demê de mirov nikare vê rewşê fam bike jî.

Ev hêzane her tim di pozîsyona êrişkirinê de ne, li kû dibe bila bibe, ger nirxek ê Kurdan hebe, dixwazin wan nirxan tune bikin û ne karekterên sedsala 21’emîn û ne jî pîvanên wijdanê vê yekê qebûl nakin.

Herî dawî êrişa hewayî ya li ser Qendîlê pêk hat bû sedema tunebûna malbatek sivîl, ev êriş ji aliyê Alîkarê Serokwezîrê welatek ku dixwaze bibe ‘welatê model’ ê Rojhilata Navîn, ji bo bibe endamê Yekitiya Ewrûpa mûzakereyan dike ve hatiye parastin. Di daxuyaniya dayî rojnameyek netewî de dibêje “Êriş rewa ne, rast e û di cihê xwe de ye” û êrişa ku li dijî sivîlan pêk hat bi xwe parastiye (Bulent Arınç/Cihan Haber Ajansi/22.08.2011)

Ez dixwazim vê yekê bi xemgînî bibêjim ku heta ku Cîhana Rojava Serokwezîrê Komara Tirkiyeyê weke mînaka Rojhilata Navîn nîşan bide, ew ê bi xwe jî her tim tundiya li hemberî Kurdan pêk tîne zêdetir bike. Gumana min ew e ku, rejîmên dîkta yên li Rojhilata Navîn hildiweşin û em bi dîktayek din re rû bi rû bimînin. Zoriyê li beşên civakê yên ku weke wî nahizirin dike, kesên ku li hemberî bûyeran helwesta wan ne wek ya wî be, li hemberî wan helwest digire û ev yek nîşaneya vê yekê ye. Divê mirov doza girtina Roj Tv ya ku bi keda gelê Kurd ên li çar hêlên cîhanê û bi gelek zimanan weşanê dike divê çarçoveyê de binirxîne.

Bi kurtî, êrişên leşkerî, siyasî, dîplomasî û ya herî girîng êrişên bê sînor ên li hemberî gelê me hemû li ber çavên rayagiştî ya cîhanî ye. Cîhana Rojava ya ku xwedî ezmûn êşên bi hezaran salane û bi van êşan nirxên gerdûnî afirandine, bi ya min tu carî evqas vala nebûye.

Weke aliyê Kurdan, hemû hewldanên me ji bo peydakirina çareseriyek demokratîk a ji bo pirsgirêkê ye. Birêz Ocalan ji sala 1993 û vir ve bi dehan car çekan bê deng kir û ji bo çareseriyeke demokratîk a pirsgirêka Kurd zemîn afirandiye. Ji bo pirsgirêkê bi vî awayî çareser bike rayagiştî ya xwe jî li gor vê îqna kiriye.

Dewletê di hemû deman de helwestek nerênî nîşan daye û pêvajoyê vala derxistiye, firsendên ku hatin afirandin ji nedîtî ve hatiye. Her di meseleya pênasekirina pirsgirêkê de berxwedêriyek dijwar nîşan daye û di her carekê de tundiyê weke yekane rêbaza çareseriya pirsgirêka Kurd dîtiye û pêk aniye.

Birêz Serok,

Niha hemû mirohiya cîhanê şahid e ku li ser vê erdnîgariyê nêzî du sed salan şer û pevçûn hene, êdî her kes li benda aramiyê ye. Divê erdnîgariya Kurdistanê nebe Filîstineke duwemîn. Divê tu kesek mînaka Srî Lankayê neyne hişê xwe jî. Berovajiyê vê, wê ev yek bibe sedema tevlîheviyên civakî û şerên etnîkî. Wê ev yek aşitiya cîhanî û mirovahiyê ber bi karesatên mezintir ve bibe.

Hêvî û xwesteka min ew e ku hûn hem di çarçoveya wijdana xwe de û hem jî di çarçoveya peywira xwe de tişta pêwîst dike bi cih bînin.

Li gel rêzdariyên min.''

Ji ANF'ê hatiye girtin