Diyarname

Weşanxaneya Lîsê ku ji bo wergerê projeyeke nû daye dest pê kirin sê pirtûk ji vê projeyê derxistin. 

Lîs ku berê jî ji wêjeya cîhanê pirtûk wergerandibûn kurdî û weşandibûn niha projeya “Cervanhtes, Projeya Wergerê 1001 Pirtûk” daye dest pê kirin. Di vê çarçoveyê de du roman yek jê jî lêkolîn 3 pirtûkên wergerê derxistin.

Yek jê  "Kallocain" romana Karin Boye, yek jê 

"Zilamê Mirî" romana D. H. Lawrence ye û ya din jî "Rizgarkirina Hiş ji Mêtingerîyê" lêkolîna Ngugi wa Thiong’o ye ku ji Lîsê derketin.

"Rizgarkirina Hiş ji Mêtingerîyê"

"Rizgarkirina Hiş ji Mêtîngeriyê pirtûka lêkolînî ya  Ngũgĩ wa Thiong’o ye ku ji aliyê Fexrîya Adsay ve ji îngilîzî ji bo kurdî hatiye wergerandin.

Nivîskar mijarên ku ev bîst sal in li ser dixebite di nav vê pirtûkê de bi cih kirine ku ew vê yekê wekî fêrkirinek jî dibîne. Mijarên di honak, şano, rexne û fêrkirina wêjeyê de bûne mijarên pirtûkê ku ev pirtûk parçeyek e ji nîqaşa li seranserî parzemînê ya li ser qedera Afrîkayê.

"Zilamê Mirî"

"Zilamê Mirî" navê romana D. H. Lawrence ye ku ji aliyê Salih Agir Qoserî ve ji îngilîzî ji bo kurdî hatiye wergerandin.

“...Dema ku destê xwe da wan, dît ku jiyan diherike. Wê gavê got “Bavo! Te çima heta niha ev ji min veşartine?” Bi meraq bi awayê ku ji dil hîs bike, bi kêfxweşiya daxwazeke eşkere destên xwe da wan û got: “Belê! Ev yek dûrî diayan e.” Kûr bû, germayiyeke bêhempa, germayiyeke zindî û dawetkar ku kare here hundir, jin, dil û navenda gulê! Qesra min, gula eşkere ye, kêfxweşiya min ev gul e!”

Nivîskarê gewre Lawrencê Îngîlîz, di vê berhemê de, di derbarê bawerî, mirin, jîyan, jin, mêr, evîn, ax û gelek tiştên din de mirovan hişyar dike. Ne tenê hişyarkirin, mirovan dihejîne û rastiya jîyanê li ber çavên mirov radixe.

Vegotinên di derbarê Îsa de çawa li cîhanê belav bûne, Lawrence bi awayekî metaforîk vedibêje. Zilamê mirî ji mezel radibe, hin caran wekî fîgurekî mîtolojiya Grêkî hin caran jî wekî yê mîtolojiya Misir û Roma li cîhanê digere. Hin caran mirî ye dûrî jiyanê ye, hin caran jî ji mirovên zindî bêtir di nav kelecana jiyanê de ye... 

"Kallocain"

"Kallocain" romana Karin Boye ye û Salih Agir Qoserî ji swêdî wergerandiye kurdî.

Dema ku Karin Boye vê romanê diqedîne û radestî weşanxaneyê dike, dibêje “Ez sozê didim ku ez ê nema tiştekî wiha erjeng binivîsim. ”

Cîhana dîstopîk ku Karin Boye afirandiye, mejiyê mirov dihejîne. 

Hemû welatîyên Dewletacîhanê di bin erdê de dijîn û ji bo dewletê dixebitin. Nirxê herî mezin, dewlet e; hemû mirov û hemû tişt ji bo dewletê ne. Daxwaza jiyaneke xwezayî û fikrên muxalîf, xayînî ne. 

Ji bo eşkerekirina sûcê fikrê, kîmyager Leo Kall madeyekî bi navê kallocain diafirîne. Kesê ku kallocain lê dikeve, hemû tiştên xwe yên veşartî, xewn û xeyalên xwe eşkere dike. Bi vî awayî gelek "sîxur û xayîn" tên eşkerekirin, lê fikir û hestên xwezayî, yên ku qet ji holê nayên rakirin jî eşkere dibin... 

- Kallocain / Karin Boye / Wergera ji swêdî: Salih Agir Qoserî / Roman / 252 Rûpel / 2018 

- Rizgarkirina Hiş ji Mêtingerîyê / Ngugi wa Thiong’o / Wergera ji îngilîzî: Fexrîya Adsay / Lêkolîn / 180 Rûpel / 2018

- Zilamê Mirî / D. H. Lawrence / Wergera ji îngilîzî: Salih Agir Qoserî / Roman / 70 Rûpel / 2018