Diyarname

Sernav ne henek e, mesele wisa ye: Tu navdar dibî, gelek navdar dibî, pêre jî gelek pereyên te çêdibin û tu radibî her yek mîlyonek dolarek pere didî 14 hevalên xwe yên berê...

Em qala lîstikvanê navdar George clooney dikin. Clooney wekî deynê xwe yê hevaltiyê, bo hurmet û bibîranîna rojên berê 14 hevalên xwe hilbijartin û her yekî mîlyon dolarek da wan. 

Lîstikvanê ji DYA'yê George Clooney ê 59 salî îsal ji aliyê kovara GQ ve wekî "Sembola Salê" hat hilbijartin. Clooney ji bo kovarê axiviye.

Yek ji wan kesên Clooney pere dabû jî Rande Gerber ê mêrê Cindy Crawford bû. Gerber, di sala 2017'an de ji bo MSBCN axivî bû û ev raz eşkere kiribû lê Clooney bêdeng mabû. Di hevpeyvîna niha ya kovarê de Clooney ev mesele piştrast kiriye. Di sala 2013'yan de bûyer diqewime. Clooney wisa dibêje: "Ez bi vê dilşad im. Tiştê ku pişt daye min ew e ku, ev mirovên ku 35 salan bi awayekî piştgiriya min kirine ne. Ez bawerim bê wan dê tu tiştek min nebana. Otobusek li min biqelibiya ev wesiyeta min dê li holê bimana. Min got ez çima li benda qelibîna otobusê bisekinim, min daxwaza xwe anî cih."
14 mîlyon dolar çawa tê belavkirin? Wisa çêdibe: Ew mînîbusek li ser "Gulfiroş" dinivîse peyda dike, dibe navenda bajêr û mînîbusê heta ber kaseyê dibe. Ew û asîstanê xwe û çend ewlekar in. Kesek din pê nizane. 14 çenteyan digire û mîlyon dolarê dixe navê.

'Piştî Amalê rewşa min guherî'

Clooney gotiye tu demê ez nefikirîm bizewicim, zarokên min Çêbin, ezê her bixebitim û jiyana xwe têr û tije derbas bikim û wan ev lê zêde kirine, "Piştî min Amal nas kir fikra min guherî, min fêm kir ku her tişt vala ye. Paşê her tişt guherî. Min fêm kir ku ez di nav valahiyekê de Bûm."

Lîstikvanê navdar di sala 2014'an de ligel parêzera îngilîz Amal Clooney a bi eslê xwe Lubnanî zewicî. Wan daweta zewaca xwe li Venedîkê çêkir û di sala 2017'an de cêwî ji bo wan çêbûn ku navên Ella û Aleksander lê kirin.

Hin hevalên Clooney

Di nav hevalên George Clooney de lîstikvan û derhêner Grant Heslov, lîstikvanê rêzefîlmê "Curb Your Enthusiasm" Richard Kind, lîstikvanê berê Tommy Hinkley, mêrê Cindy Crawford Rande Gerber jî heye.

Oscar jî têde gelek xelatên wî hene 

George Clooney di 6'ê gulana 1961'ê de li Kentucky ya DYA'yê hatiye dinê. Lîstikvanekî navdar e. Oscar ji di nav de gelek xelatên wî hene. Niha ligel lîstikvanî ji bo barê derhênerê, senarîstî û sazkariya fîlman jî girtiye ser milên xwe. EW zêdetir bi fÎlmê "Ocean's Eleven" navdar bû. Di salên 1997 û 2006'an de ji aliyê Kovara People ve wekî mêrê herî seksî hat hilbijartin. Di sala 1997'an de lîstikvanên televîzyonê yê herî xweşik kincan li xwe dike hat hilbijartin. 

Di sala 2005'an de dema fîlmê "Syriana" kişand qeza derbas kir û demekê bîrkor bû, tiştek nedihat bîra wî.

Di 16'ê adara 2012'yan de li ber Balyozxaneya Sûdanê daxuyanî da û got rayedarên Sûdanê sûcê şer dikin, ji ber vê yekê hat binçavkirin.