AMED
Hevseroka Komeleya Alîkarî û Hevgirtinê ya Rojava Zarîfe Ozbeklî ji bo malbatên neçar man ku ji Sûrê derkevin banga seferberiyê li gelê Amedê kir û got: "Em naxwazin gelê me ji Amed, Mêrdîn û Şirnexê derkevin. Eger em hevgirtina xwe xurt bikin, hembêza xwe vekin dê kes mecbûr nemîne ku biçe metropolên Tirkiyeyê."

Hikumeta AKP'ê di çarçoveya konsepta şerê taybet de, bi mehan e ku bi êrîşên giran ên bi destê hêzên dewletê ve tê kirin de dixwaze bi taybet bajarên berxwedanê bide valakirin. Di nav 6 mehên borî de li Cizîr, Silopî, Farqîn, Sûr û gelek bajarên Kurdistanê bi hezaran mal bi topbaranê hatin xirakirin an jî şewitandin. Ji ber vê yekê bi hezaran malbat neçar man ku ji bo demekê be jî koçî derdorên nêz bibin. 

Li Amedê jî, şêniyên Sûrê yên malên wan hatin xirakirin û neçar man ji taxên xwe derkevin, ji Amedê derneketin û li taxên cûda yên bajêr xwe bicih kirin. Gelê Amedê jî bi hevgirtineke xurt hewl dide ku pêdiviyên van malbatan çareser bike. Hevseroka Komeleya Alîkarî û Hevgirtinê ya Rojava Zarîfe Ozbeklî der barê xebatên xwe de agahî dan. 

'Kes koçî bajarên Tirkiyeyê nekir'

Ozbeklî bibîrxist ku dema ji ber komkujiyên DAIŞ'ê malbat koçî Bakurê Kurdistanê kirin, alîkariya wan kirine niha jî li Bakurê Kurdistanê alîkariya malbatên ku ji ber êrîşên hêzên dewletê neçar manê û koç kirine, dikin. Ozbeklî da zanîn ku malbatên ji ber êrîşên dewletê neçar dimînin û ji malên xwe derdikevin naçin bajarên Tirkiyeyê û li ser axa xwe dimînin û wiha axivî: "Sûr, Cizîr, Şirnex, Nisêbîn, Kerboran, Silopî hate dorpêçkirin û zext li însanan hate kirin ku koç bikin. Qasî ku ji dest hat li ber xwe dan, mal dan, can dan, malên an xira bû. Ji ber taqeta wan nema dibe ji sikaka xwe, taxa xwe koç kiribin lê welatê xwe terk nekirin."

Ozbeklî anî ziman ku li gel şaredarî û saziyên civaka sivîl hewl didin pêdiviyên bingehîn ên koçberan çareser bikin. Ozbeklî got ku heya niha 14 kamyon melzeme ji Cizîr, Silopî, Şirnex, Kerboran, Nisêbîn û Sûrê re hatiye şandin lê li bajarên dorpêçkirî ev alîkarî hatine astengkirin.

'Bila herkes malbatekê bigire ba xwe'

Ozbeklî diyar kir ku li Amedê, malbatên ku du malên wan hene malekî xwe didin malbatên ku ji malên xwe derketine û divê ev were firehkirin. Ozbeklî destnîşan kir ku bihistyarî heye lê têr nake û wiha berdewam kir: "Gelek malbat di malekê de dijîn. Divê herkes dikaribe malbatekê bigire ba xwe."

'Ji bo Sûrê seferberî'

Ozbeklî bang li gelê Amedê kir ku herkes ji bo malbatên ku ji Sûrê koç kirine seferber bibe û wiha axivî: "Ev însanên me ne ku têne qetilkirin. Divê em dest bidin dest û wan tenê nehêlin. Hevgirtina bi van kesan re hevgirtina berxwedanê ye. Em banga seferberiyê li herkesî dikin. Her kêlî dengê çek û topan bilind dibe. Kevir li ser kevir namîne."

'Bila kes neçar nemîne û neçe metropolên Tirkiyeyê'

Ozbeklî da zanîn ku bi hemû fîrmayên otobosan ên Amedê re axivîne ku koliyên alîkariyê bê pere were şandin û di nav Sumer Parkê de jî depoya Komeleya Rojava heye û herkes dikare alîkariyên xwe bigihîne vê derê. Ozbeklî herî dawî bang li gelê Amedê kir ku hevgirtina xwe xurt bike û got: "Em naxwazin gelê me ji Amed, Mêrdîn û Şirnexê derkevin. Eger em hevgirtina xwe xurt bikin, hembêza xwe vekin dê kes mecbûr nemîne ku biçe metropolên Tirkiyeyê."

(DÎHA)