Diyarname
Rojên Belgefîlman a Egeyê îsal 4'emîn car li dar dikeve. Belgefîlmê bi navê Rewşen ku li ser rewşa ziman û wêjeya kurdî ya salên 90'î disekine jî beşdarî vê çalakiyê dibe.

Civaka Xebatên Ragihandinê ya ku di bin banê Fakulteya Ragihandinê ya Zanîngeha Egeyê de xebatên xwe dike, Rojên Belgefîlman a Egeyê li dar dixe. Îsal di navbera 12-13'yê gulanê de Rojên Belgefîlman li dar dikeve. Çalakiya ku bi armanca "Li Îzmîrê di serî de xwendekar, em dikin ku belgefîlmên Tirkiyeyê ragihînin her kesî" li dar dikeve, belgefîlman bê pere nîşan dide û her kes dikare here temaşe bike.

Di daxuyaniya ku ji bo bernameyê hatiye amadekirin de wisa tê gotin: "Belgefîlm bîra me, nîqaşê çê dikin, bi riha rasteqîn a jiyanê ya belgefîlman em dibin xwedî fikir, bi vê yekê jî dike ku em qadên xwe yên jê berpirs bibînin û ferq bikin. Ew, ji aliyê çêkirina bîra civakî ve jî xwedî wateyeke girîng in."

Di vê çarçoveyê de 24 belgefîlm têne nîşandayîn ku di nav de belgefîlmê Cemil Oguz ê bi navê "Rewşen" jî heye. Rewşen balê dikişîne ser salên 90'î. Heta salên 90'î li Tirkiyeyê bi her awayî peyva 'Kurd' bi xwe jî qedexe bû. Di sala 1991'ê de zagona bi hejmara 2932'yan diguhere û bi vê yekê rê li ber 'weşanên ji bilî tirkî' vedibe. Û kovareke bi navê Rewşen ji alî xebatkarên Navenda Çanda Mezopotamyayê ve tê derxistin. Kovar di serî de tirkî-kurdî ye û her ku diçe hemû dibe kurdî. Di deh salên ku kovar derdikeve de ji bo rewşenbîriya kurdî roleke mezin digire ser milên xwe; jê nifşekê dertê. Belgefîlmê "Rewşen" jî vê serdemê, ji salên 90'î heta 2000'î radigihîne ber çavan, dibe şahidê pêşketina kurdî û di heman demê de anekdotên, bûyerên girîng ên van salan tîne ziman.

"Rewşen" ku di meha avrêlê de di 30'emîn Festîvala Fîlman a Navneteweyî de hat nîşandayîn vê carê li Zanîngeha Egeyê derdikeve pêşberî temaşevanan. Di çarçoveya Rojên Belgefîlman a Egeyê de roja 12'yê gulanê saet 14.55'an de li Fakulteya Ragihandinê ya Amfîya Nimreya 2'yemîn tê nîşandayîn.

Di vê çalakiyê de hin belgefîlmên derhênerên kurd ên din jî hene. Belgefîlmê "Çar demsal: Şewaxan" ê derhêner Kazim Oz ku li gelek festîvalan xelat girtibû jî beşdarî Rojên Belgefîlman a Egeyê dibe. Belgefîlmê ku heta niha beşdarî gelek festîvala bûbûn dê li Egeyê jî derkeve pêşberî temaşevanan.
Her wiha ji derhênerên kurd "Kahpe Devran" ê Cahit Çeçen, "Diya min aştî dixwaze" yê Aziz Çapkurt jî têne nîşandayîn.
Di Rojên Belgefîlman a Egeyê de dê ev belgefîlm derkevin pêşberî temaşevanan: 'Cono Ahmet’in Çocuklari', 'Son Surat: İstanbul', 'Kapak Olsun', '17’nin Otesinde Erdal Eren Davasi', 'Tulay German: Kor Ve Ateş Yillari', 'Urbanbugs', '12 Eylul', '70-80-90 Masum Kustah Fettan', 'Arabeks', 'Bir Avuç Cesur İnsan', 'Son Kale', 'Ofsayt', 'Alamet-i Ustuvane', 'Demir Çakir Demir Asa', 'Kayip Topraklarin Çocuklari', 'Yildiz Alpar: Bedii Rakstan Bugune', 'Sesim Ruzgara', 'Anadolu’nun İsyani', 'Olucanlar', 'Uçurtmam Tellere Takildi'

Belgefîlm, li Amfiya Nimreya 2'yan û li Amfiya Prof. Dr. Sermet Akgun ên Fakulteya Ragihandinê ya Zanîngeha Egeyê bêne nîşandayîn. Her du rojan, ji saet 12.30'yan heta 19.30'an bê navber belgefîlm li dû hev têne nîşandayîn.

***

Nûçeyên eleqedar:

- Rewşen derket pêşberî temaşevanan