Diyarname

Di Lîga Suer a Tirkiyeyê de tîma Stenbolê Başakşehîr yekemîn car bû şampiyon. Ev şampiyonî çawa çêbû?

Klûba Fûtbolê ya Başakşehîrê di sala 1990'î de ji aliyê Şaredarê Stenbolê yê wê demê Nurettin Sozen ve hate avakirin. 1991'ê de di Lîga Amator de bi ser ket û derbasî Lîga 3'yemîn a Tirkiyeyê bû ku ev lîg û lîgên 2'yemîn, 1'yemîn û Super Lîg lîgên profesyonel in. Tîm di serdema 1992-93'yan de bi ser ket û derbasî Lîga 2'yemîn bû. Van salan ketin û rabûnên tîmê çêbûn lê di sala 1998-99'an de performanseke baş nîşan da û derbasî Lîga 1'yemîn bû.

Sala 2006-07'an de Abdullah Avci kirin teknîk dîrektor û wî tîm derxist Super Lîgê. 

Tîm di sala 2012-13'yan de ji Super Lîgê ket Lîga 1'emîn lê piştî salek (serdema 2013-14) carek din derket Lîga Super.

Navê wê yê wê demê her İsbanbul Buyukşehîr Belediye Spor bû lê vê salê, yanê sala 2014'an de nav guhart û bû Îstanbul Başakşehîr FK. Ji wê rojê de Şaredariya Bajarê Mezin a Stenbolê helbet bi piştgiriya hikumeta Tirkiyeyê zêdetir piştgirî dan tîmê.

Dîsa wê salê Abdullah Avci carek din anîn ser tîmê û serdema pêşketina klûbê carek din dest pê kir. Sala 2014-15'an di rêza 4'emîn de temam kir ku ev serketin bû ji bo wan. Sala 2015-16'an jî bi heman awayî temam kirin.

Di sala 2013'yan de stada wan vebû ku navê Fatih Terim lê kirin. Ew hê jî maçên xwe di Stana Fatih Terîm de dilîzin ku kapasîteya stadê 17.800 e.

Sponsor

Koma Medîpol Saglik ku ev kom nêzî hikumetê ye di sala 2015'an de sponsorî ligel tîmê çêkir û ji wê rojê de tîm wekî Medipol Başakşehir Futbol Klubu xebata xwe didomîne.

Û şampiyon

Başakşehîr maça xwe ya şampiyoniyê êvara 19'ê mehê li mala xwe ligel Kayseriyê lîst. Tîm bi 1-0 bi ser ket û pûanên xwe derxistin 69'an. Bi vê yekê berî lîg bi dawî bibe bi hefteyek şampiyoniya xwe ragihand. Di rêza duyemîn de Trabzon Spor heye ku xwedî 62 pûanan e.

Okan Burukê ku niha wekî teknîk dîrektor tîm kir şampiyon di sala 2008-09'an de wekî lîstikvan beşdarî tîmê bûbû. Li Tirkiyeyê bi rêzê herî zêde Galatasaray (GS), Fenerbahçe (FB), Beşîktaş (BJK), Trabzon bûne şampiyon û ji bilî van Bursa carek, Başakşehîr jî bû carek dibe şampiyon. Teknîk Dîrektor Buruk jî bi vê pênaseya xwe yekemîn car dibe şampiyon.

Li aliyê din Serokê Klûbê Goksel Gumuşdag e ku ew di li ser navê AKP'ê endamê Meclisa Şaredariyê ya Bajarê Mezin a Stenbolê ye.

Îsal rewşa TS û Başakşehîr

Li gelek welatan siyaset dest diavêje sporê lê li Tirkiyeyû welatên wekî Tirkiyeyê ev yek zêdetir dixuye. Îsal heta berî pandemiyê Trabzon Spor (TS) xurt bû, û ber bi şampiyoniyê ve dibeziya. TS bi temamî 6 caran û herî dawî 1984'an de bûbû şampiyon. Îsal hikumetê piştgiriyeke mezin dida tîmê ku tê îdîakirin ku bi taybetî Albayrak li pişt e. Wezîrên Hikumeta AKP'ê eşkere anîn ziman ku ew dixwazin TS bibe şampiyon. Ev hewldana wan dom kir lê UEFA'yê biryar da ku TS salek dê dikaribe di Lîgên Ewroqayê de bilîze ku sedem ne li gor rêgezên fînansê tevgeriya ye. TS'ê di CAS'ê de îtîraz kiriye. Piştî vê dîsa hinên li nav hikumetê ku ev çend sal bûn zêdetir piştgirî didan û li ser disekiniyan zêdetir li ser sekinîn.

Û pirsa çawa bû şampiyon?

Piştî duh Başakşehîr bû şampiyon rojnameya Fotomaçê agahiyên balkêş anîn ziman. Fotomaç ku aîdê koma Albayrakan e gotinên şaîbeyî (hîleyî) anîn ziman. Rojnameyê nivîsî ku ji destpêta serdema fûtbolê ya îsal ve Lijneya Hakêman a Navendî piştgirî daye Başakşehîrê û ew kiriye şampiyon. Rojnameyê got ku bi hefteyan li hemberî TS, GS, FB, BJK û Sivasê xetayên gelek xirab kirine û bi vî awayî rê li ber Başakşehîrê vekirine.

Her tişt aborî ye

Başakşehîr ku niha bû şampiyon ji bo beşdariya Lîga Şampiyonan a Ewropayê û her wiha ji lîga Tirkiyeyê dê 35 mîlyon Euro pere bikeve kaseya wê. Her wiha ev çend sal in îdîaya ku klûbê difroşin/firotine Katarê li dar e û tê îdîakirin ku ji bo vê yekê ew kirine şampiyon.