DiyarName.Com

‘Bila wekî quretî neyê fêmkirin lê li benda bertekeke wisa bûm’

Stranbêjê ciwan Mirad Demîr vê hefteyê bi deranîna singla strana gelêrî ya bi navê “Hey Nermê” di cihê serekê yê medyaya

Hevpeyvîn: Zekî Ozmen

Stranbêjê ciwan Mirad Demîr vê hefteyê bi deranîna singla strana gelêrî ya bi navê “Hey Nermê” di cihê serekê yê medyaya civakî ya bi kurdî de cih girt. Strana bi hevkariya Erdem Altinses hatiye amadekirin dengek mezin veda. Klîba singla wî di van çend rojan de bi hezaran car hat parvekirin. Heta vê hefteyê kêm kesan navê wî bihîstibû. Wî, vê hefteyê gaveke mezin ber bi xeyala xwe ve avêt. Mirad Demîr ji bo bibe muzîkvan dev ji zanîngehê berdabû. Niha jî li Stenbolê debara xwe bi muzîkê dike. Me ji bo Diyarnameyê pirsên meraq dikirin jê pirs kirin û wî jî bersiv dan:

Bi derketina singla te ya “Hey Nermê” re medya civakî serobino bû. Babet bû parvekirin, ecibandin û pesinandina vê stranê. Piştî ew qas kefteleftê derûniya te niha di çi rewşê de ye?

Mirad Demir: Kêm zêde salek çêbû ku ez li ser covera vê stranê dixebitim û bi rastî gelek kêfxweş bûm bi helwesta erênî ya guhdaran. Hêvîdar im dê berdewama vê xebata me jî were...

Tu pêşiya weşandina vê stranê li benda bertekeke çawe bûyî gelo?

Wekî min got gelek demeke dirêj e em li ser vê stranê dixebitîn û bila wekî quretî neyê fêmkirin lê heqeten ez jî li benda bertekeke wisa bûm, ji ber ku tevlî hemû dost û hevalên ku alîkarî dan min em bi kedeka bêhempa xebitîn.

Cara ewilî ye dibim şahid ku stranbêjekî nayê naskirin di muzîka kurdî de bi singlekî ew qas nav dide. Sir an jî şîreteke tu li stranbêjên ji te hesidîn bikî heye?

Bi min ev salên dawî ku medyaya civakî pêşketî avantajek e ji bo kesên fena min ku zêde nayên naskirin. Lewra êdî dem ne dema berê ye ku em bêjin kesên di hemû hêlên hunerê tên nasîn dikarin deng vedin! Şert û merc guherîne: êdî kesên amator jî dikarin xwe bi mîlyonan bidin temaşekirin û îspatkirin. Min ne bawer e ji xeynî xweşikbûyîna pora min a xelek hin stranbêj ji min bihesidin :)

Komên muzîkê yên wekî Lawje, Kardeş Turkuler û Rastak jî muzîkeke nêzîkî vî şêweyî çêdikin. Şêwaza te ne tişteke nû ye. Lê rewş wisa çêbû wekî ku ji ber hebûna valahiya vê stîlê her kes li benda stranên bi vî şêweyî bin...

Yên din li vî diyarî lê Lawje hem wekî komeke muzîkê û hem bi kesayetî mamoste Elî Tekbaş îdolê min ê muzîkê ye. Bi min valahiyek di vê stîlê de nîn e bes tarzên din gelek gelek zêde ne.

Rola Erdem Altinses di singlê de çi ye?

Bêhenek dibêjim, ger ev pirs wiha bûya jî dibû: “Rola te çi ye li ber a Erdem Altinses a di vê singlê de” :) kedeka bêhempa û aqilekî kûr e Erdem Altinses. Mala wî hezar carî ava.

Bala min kişand ku klîb zêde hêsanî û bêzehmetiyek mezin li ser dikê hatiye kişandan. Çima ev tercîha vîdeoyî?

Pirsa herî hêsan ev bû bo min :) bersiv jî wekî her kesî texmîn kiribe ev e: rewşa me a aborî mixabin. Û ji vir dîsa spasiyên xwe pêşkeş dikim bo ŞA Performansê ji bo sahneya xwe bi me re parve kir, spasiyek mezin bo derhêner Aram Dildar ku bi dil û can klîba me kişand û her wisa spasiyek bo rêveberên ŞA Performansê Egît Firat û Tuncay Ozel.

Te xêr ji singlê dît û te nav da. Tu yê bi singlan karê xwe yê muzîkî dewam bikî yan bi albumê?

Ger şert û merc destûr bidin min dil heye dem bi dem bi çend singleyên din bidomînim, niha fikrekî wekî albumê tune di serê min de.

Min têra xwe pirs kirin, tiştek di dilê te de mabe fermo...

Spasiyeke mezin bo we jî dikim bo van pirsên xweş û bi kêf. Mezintirîn xwesteka min ew e ku rojek bê di festîvalên tenê bi kurdî û profesyonel de derkevim ser sehneyan...

Mirad Demîr kî ye?

Mirad Demir di sala 1992’yan li navçeya Çêlê ya Culemergê ji dayik bûye û heta zanîngehê hemû dibistan li Culemergê xwendine. Li Zanîngeha Rihayê Beşa Endezyariyê xwendiye lê bi gotina wî “ji ber hiş û aqlê wî tenê li ser muzîkê bû” zanîngeh terikandiye. Bi awayekî amatorî dest bi muzîkê kiriye. Li cafeyan, konsertên biçûk û li hin çalakiyan derdikeve ser dikê. Niha li Stenbolê dijî û debara xwe jî bi muzîkê dike. Bi weşandina singla “Hey Nermê” vê hefteyê gaveke mezin ber bi xeyala xwe ya muzîkvaniya profesyonelî ve avêt.