DiyarName.Com

Festîvala Fîlman a Stenbolê salek din jî derdikeve pêşberî sînemahezan: Îsal ji 45 welatan 186 fîlmên 187 derhêneran dib

Cemil Oguz

Festîvala Fîlman a Stenbolê salek din jî derdikeve pêşberî sînemahezan: Îsal di navbera 5-16'ê avrêlê de, ji 45 welatan 186 fîlmên 187 derhêneran dibin 19 beşan de têne nîşandayîn.

Ji bo eşkerekirina bernameya 38'emîn Festîvala Fîlman a Navneteweyî ya Stenbolê li The Marmarayê merasimek li dar ket. Pêşî Midûrê Giştî yê ÎKSV'ê Gorgun Taner axivî û diyar kir ku ji Festîvala yeke heta niha gelek tişt guherîn, di vê pêvajoyê de peyvên berdewamkirin, dîjîtalbûn her ketine jiyana me. Bi taybetî dîjîtalbûnê di nav jiyanê de gelek tişt guhartin lê baweriya min ew e ku di sala 2019'an de jî pêdiviyên me neguherîn. Taner wisa dom kir: "Em dibînin ku ji Tirkiye û ji qada navneteweyî bernameyeke neqandî hatiye sazkirin. Dîtina vê yekê ji aliyê fikrî ve zewqê dide me. Ji ber ku em bi awayekî fizîkî di nav çalakiyeke wisa çandî û hunerî de ne, ji bo em vê yekê bînin cih em wekî ÎKSV 'bi hezkirin' em xebata xwe didomînin."

Dûre Dîrektorê Festîvalê Kerem Ayan axivî, bi berfirehî qala naveroka bernameyê kir. Her wiha Ayan bal kişand ser nebûna fîlmên derhênerên jin û diyar kir ku divê zêdetir piştgiriya wan bê kirin. Her wiha Ayan got ku ji sala bê dê êdî fîlmên li Tirkiyeyê neketine vîzyonê bigirin nav bernameyê û got ku em ji niha de vê yekê eşkere dikin. Herî dawî jî Gulin Ustun li ser beşa wan a "Koprude Buluşmalar" (Hevdîtinên Li Pirê) agahî dan.

Bi 'Edmond'ê dest pê dike

Festîval bi fîlmê derhênerê fransiz Aleksis Michalik ê bi navê "Edmond" dest pê dike. Derhêner Michalik bi pênaseyê "Prensê Şanoya Fransayê" tê nasîn. Derhêner berê kamerayê dide nivîskar Edmond Rostand ku di sala 1897'an de teksta jiyana "Cyrano de Bergerac" nivîsîbû. Fîlm çîroka derketina vê tekstê pêşkêş dike. Ji vê tekstê berê jî fîlm hatibûn kişandin. Niha fîlmê "Edmond" dê wekî fîlmê destpêkê bê nîşandayîn û her wiha di beşa "Galalar" a festîvalê de jî derkeve pêşberî temaşevanan.

Pêşbaziya neteweyî û navneteweyî

Di festîvalê di beşa Pêşbaziya Navneteweyî de 12 fîlm ji bo Laleya Zêrîn dê bikevin qayişkêşanê. Di vê beşê de ligel fîlmê ji Danîmarka, îngilistan, DYA, Koreya Başûr, îran, Rusya du fîlmên ji Tirkiyeyê jî hene. Yek jê "Nebula" yê derhêner Tarik Aktaş û yê din jî yê derhênera kurd Rûken Tekeş "Aether" e.

Fîlmên derhênerên kurd jî di pêşbaziyê de ne

Di Pêşbaziya Neteweyî de jî 9 fîlmên metrajdirê ji Tirkiyeyê hene. Ji van didu jê yên derhênerên kurd in.

Tarik Aktaş bi "Nebula", Emin Alper bi "Kiz Kardeşler", Bariş Atay bi "Aden", Omur Atay bi "Kardeşler", Osman Nail Dogan bi "Guvercin Hirsizlari", Ali Vatansever bi "Saf", Emre Yeksan jî bi "Yuva" di vê beşê de ye. Ji derhênerên kurd Huseyîn Karabey vê carê bi "Îçerdekîler" (Yên li hundir) di vê beşê de ketiye dû xelata Laleya Zêrîn. Derhênerê kurd Serhat Karaaslan ku heta niha bi kurtefîlmên xwe bal kişandibûn bi yekem fîlmê xwe yê metrajdirêj "Gorulmuştur" (Hatiye Dîtin) di festîvalê de ye û di nav pêşbaziyê de ewê jî bikeve dû xelatê.

Ali Kemal Çinar ku hefteya borî fîlmê xwe "Di navberê de" xistibû vîzyonê bi vî fîlmê xwe li festîvalê ye lê derveyî pêşbaziyê.

11 belgefîlm di pêşbaziyê de ne

Di beşa Pêşbaziya Belgefîlman de jî 11 belgefîlm hene. Belgefîlmê derhêner Rûken Tekeş di vê beşê de jî cih girtiye. Belgefîlmên din ên vê beşê ev in: "Meleklerin Koruyucusu" (Derhêner Ensar Altay), "Tanri Goçmen Çocuklari Sever mi Anne? (Derhêner Rena Lusin Bitmez), "Şehitler (Derhêner Koken Ergun), "Yaz Kiş Demeden" (Derhêner Zeynep Guzel), "Kopek Filmi" (Derhêner Cem Hakverdi), "Bulutlar" (Derhêner Osman Nuri İyem), "Kâzim" (Derhêner Dilek Kaya), "Gulyabani" (Derhêner Gurcan Keltek), "Baştan Başa" (Derhêner Aylin Kuryel, Firat Yucel), "Vargit Zamani" (Derhêner Orhan Tekeoglu).

19 beş û gelek fîlm

Di festîvalê de 19 beş hene ku gelek jê balkêş in. Fîlmên li Festîvala Berlînê xelat girtine, 13 fîlmên metrajdirêj ên derhênerê navdar Stanley Kubrick, klasîkên sînemaya tirk hin ji wan in.

Salonên sînemayê û seansên wan

Îsal li 8 salonan, li Beyogluyê li Salona Sînemaya Atlas, Sînemaya Beyoglu, Oditaryûma Muzeya Perayê; li Nîşandayî li Cinemaksîmûm City'si (salon 3 û Salon 7); li Gayrettepe li Cînemaksîmum Zorlu (salon 8) û li Kadikoy jî li Sînemaya Reks û li Sînemaya Kadikoy fîlm têne nîşandayîn. Nava hefteyê di seansên 11.00, 13.30 û 16.00 de bilêtên fîlman bi 10 TL, nava hefteyê seansên 19.00 û 21.30, her wiha hemû seansên dawiya hefteyê buhaya bilêtan bi 25 TL'yî ye.

Ji bo agahiyên zêdetir:

film.iksv.org