Navenad Nûçeyan

Gelek sazî û partiyan ji bo pîrozkirina ragihandina Kantona Xweser a Cizîrê peyam weşandin.

KCD: Kantona Cizîrê ku yekem qada xweser a Şoreşa Rojava ye

Kongreya Civaka Demokratîk (KCD) îlankirina xweseriya demokratîk ya li Kantona Cizirê silav kir.  KCD’ê di berdewamiya daxuyaniya xwe de da zanîn ku gelê kurd yê Rojava ku di şerê navxweyî yê Sûriyeyê de nebû alîgir û têkoşîneke jiyana azad û demokratîk da, hatiye qadeke ku dikare xwe bi xwe bi rê ve bibe û wiha dom kir: “Kantona Cizîrê ku yekem qada xweser a Şoreşa Rojava ye, ji nirx û qezencên netewî yê gelê kurd re pêşengî kiriye û nirxên mezin lê zêde kiriye. Ev rêveberiya ku bi hêza xweser ya gelê Rojava hatiye îlankirin, dê li her çar paçeyên Kurdistanê bibe mînak. Bi van qezencên ku li Rojava hatine bidestxistin re kurd di têkoşîna hebûnê de gihîştine asteke girîng. Ev qezenc dê hem ji bo gelê kurd û hem jî ji bo hemû gelên bindest bibe çavkaniya heyecan û morelê. Ji ber vê jî xwedî derketina gelê kurd ya li vê qezencê û mezinkirina wê gelek girîng e. Di vê esasê de em berxwedana Gelê Rojava silav dikin û qezenca wan pîroz dikin. Em di wê baweriyê de ne ku kantona Cizîrê dê hêzê bide têkoşîna azadî û demokrasiya gelan."

Kongra Gel: Parastina Rojava erka 40 mîlyonî ye

Hevserokatiya Kongra-Gel, Rêveberiya Xweseriya Demokratîk a Kantona Cizîrê silav kir û got: “Îlankirina Xweseriya Demokratîk a Kantona Cizîrê, bersiveke dîrokî ye li wan hêzên civîna Cenevre II amade kirine û bang li nûnerên gelên Rojavayê Kurdistanê nekirine. Gelên Cizîrê bi îlankirina îrada xwe, ew welat û hêzên ku naxwazin rastiya gelên Rojava bibinin, siyaseta wana vala derxistin.

Kongreya Gel di dawama daxuyaniya xwe de diyar kir ku gelê Rojavayê Kurdistanê bi îradeya xwe Rêberiya xwe îlan kirîne û wiha got: “Bi avakirina xweseriya demokratik, gelên Rojavayê Kurdistanê him ji bo pêşeroja xwe îradeya xwe rêxistin dikin, him ji bo hemû ol û gelên Sûriyeyê rêya çareseriyê nîşan dikin, him jî di heman demê de ji bo hemû pirsgirêkên rojhilata navîn dibin nimûneya çareseriyê. Ev pêngav wê bandoreke stratejîk li pêşeroja çar parçeyên Kurdistanê bike. Neyar û dilnexwestên şoreşa Rojavayê Kurdistanê jî pir in. Pêwîste gelê Kurdistanê baş bizanibe ku parastin û xwedîderketina li gelên Rojava, li ser milê çil milyon gelê Kurd erkeke herî mezin e."

Heyet El-Tensîq îlana Xweseriya Demokratîk pîroz kir

Desteya Niştimanî ya Hêzên Veguhertina Demokratîk (Heyet El-Tensîq) bi daxuyaniyekê rêveberiya xweseriya demokratîk a Kantona Cezîrê li hemû pêkhateyên Rojava pîroz kir. Di daxuyaniya nivîskî ku ji aliyê Buroya Ragihandina Heyet El-Tensîq hatiye weşandin de, rêveberiya xweseriya demokratîk a Kantona Cezîrê li hemû gelê Sûriyê û pêkhateyên Cezîrê ji Kurd, Ereb, Suryanî û hemû netew û olên din ên kantonê hate pîrozkirin.

Di berdwama daxuyaniyê de hate destnîşankirin ku rêveberiya xweseriya demokratîk  wê hêvî û xweseteka hemû welatiyan a ji bo rêveberiyeke demokratîk û civak hevbeş pêk bîne. Di daxuyaniyê de hate diyarkirin ku rêveberiya xweseriya demokratîk yekîtî û aramiya Sûriyê û welatên cîran tehdîd nake, berevajî vê yekê rêveberiya xweseriya demokartîk dê bibe nimûne ji bo rêveberiya ewlekarî, xizmet û aramiya civakî ya di rewşên herî zehmet ên welat de.

PAJK'ê Rêveberiya Xweser a Cizîrê silav kir.

Partiya Azadiya Jinê ya Kurdistanê (PAJK) bi daxuyaniyeke nivîskî diyar kir ku ew vê gava dîrokî ya tê wateya rêveberiya xweser a demokratîk û gelparêz silav dikin.

KJB'ê jî silav kir

Koma Jinên Bilind (KJB) bi daxuyaniyeke nivîskî îlana Rêveberiya Xweseriya Demokratîk a li Kantona Cizîrê ya Rojava pîroz kir. KJB'ê wisa got:  "Di serî de jin em hemû gelê xwe û gelên berxwedêr ên li dijî hemû êrîşan bi bîr, bawerî û berxwedaneke mezin xizmetî Şoreşa Rojava kirin, silav dikin. Ev pêşketina ku pratîka yekemîn a modela xweseriya demokratîk a gelan e, ku wê li Rojhilata Navîn rê li ber demeke nû veke, li tevahiya gelên Rojhilata Navîn pîroz dikin. Hemû şehîdên xwe yên ji bo parastin û pêşvebirina destketiyên li Rojava bi lehengî li ber xwe dan bibîr tînin û soza dilsoziyê careke din dûbare dikin."

PÇDK'ê Xweseriya Demokratîk a Kantona Cizîrê pîroz kir

Hevserokên Partiya Çareserî û Demokratiya Kurdistanê (PÇDK) îlankirina Rêveberiya Xweseriya Demokaratîk a Kantona Cizîrê pîroz kirin. Hevserokên PÇDK'ê Necîba Umer û Diyar Xerîb bi daxuyaniyeke hevbeş rêveberiya xweseriya demokartîk a kantona Cizîrê li hemû gelê Rojava pîroz kirin û diyar kirin ku avakirina rêveberiyên xweseriya demokratîk dê roleke erênî di çareseriya pirsgirêkên li Sûriyê û Rojhilata Navîn de jî bilîze.

Di daxuyaniyê de hate destnîşan kirin ku rêveberiya li Rojava nûnertiya hemû pêkhateyan dikin û dê bibe amûra jiyana hevbeş. Di daxuyaniyê de hate destnîşan kirin ku pêkhateyên Rojava dikarin bi îmkanên xwe yê xweser îradeya xwe rastîn bi rêvebibin. Di daxuyaniyê de hate bîr xistin ku tevlî hemû zehmetiyan û ambargoya ji aliyê rêjîmê û hêzên herêmê jî gelê Rojava karîbû parastina xwe bikin û siyaseta xwe ya rast destnîşan bike.

**

Nûçeyên eleqedar:

- BDP'ê ragihandina Kantona Cizîrê pîroz kir 

- Yek bi yek vaye Serokê Meclisê û Wezîrên Kantona Cizîrê 

- Kantona Cizîrê, Hevserok û Rêveberiya wê hate ragihandin