Tora Akademisyenên Kurd Kurd-Akad bi rêya daxuyaniya komîteya xelatdayînê da zanîn ku ji bo xelata rûmetê ya zanistî û ji bo xelata zanyarên ciwan ew miracaetên namzetiyê qebûl dikin. Seroka Kurd-Akadê, Dersim Dagdeviren jî got, heta niha bêhtir ji beşên tibê elaqe ji bo namzetiyê diyar e.

Kurd-Akadê, par ji bo cara yekem xelatên rûmetê dan ji bo tevkariya zanistî ya taybet û angajmana di ser xwe re ya civaka sivîl. Profesor Celîlê Celîl û Profesor Noam Chomsky, par ev xelata rûmetê wergirtin. Celîlê Celîl ji ber xebata xwe ya di ser xwe re ya li ser Kurdolojiyê û Noam Chomsky jî ji bo angajmana xwe ya civaka sivîl, nexasim jî parastina mafên hindikahiyan û li ber rabûna rejîmên zordest hêjayî xelatê hatibûn dîtin.

Dixwazin bidin zanyarekî ciwan

Kurd-Akad îsal dixwaze vê xelata rûmetê temam bike bi xelata zanistê ya ji bo zanyarên ciwan. Xelatdayîn jî wê di qebûla salane ya Kurd-Akadê de pêk were.

Çawa ku ji navê wê jî diyar e, ev xelata dawî, nexasim wê ji bo zanyarên ciwan ên Kurd be ku bi xebata xwe ya di ser xwe re ya zanistî derdikevin pêş.

Zanyarên namzet tên nîşandan dikarin ji her neteweyê bin. Şertê herî pêş jî hene ji bo herdu xelatan; ji bo xelata zanyarên ciwan, di vê kesa namzet lîsansa (Bachelor) xwe temam kiribe. Herçî ji bo xelata rûmetê ya zanistê namzet hatibe nîşandan, divê piştî bi dawî kirina doktoraya xwe, herî kêm du salan xebitîbe.

Îsal tib li pêş xuya ye

Li ser mijarê Seroka Kurd-Akadê, Dersim Dagdeviren got, wan banga namzet nîşandanê kiriye, heta niha ji bo namzet nîşandanê gelek pirs li wan hatine kirin. Dosyayeke bê kêmasî ya namzetiyê jî ji Swêdê hatiye ber destê wan. Dagdeviren got, wekî din ji bo xelata rûmetê ya zanistê, gelekî muhtemel e ku ji bajarê Elmanyayê Wurzburgê, ji beşa anatomiyê, komeke li ser dermankirina nexweşiyên giran dixebite, xwe bike namzet, yan jî ji aliyê hinan ve namzet bê nîşandan. Di nava vê komê de zanyarên Kurd jî hene.

Dersim Dagdeviren a ku bi xwe jî bijîşka zarokan e, nexwest navan zêde ji niha ve eşkere bike, lê got, zanyarekî Kurd ku di warê lêkolînên dermankirina nexweşiya AIDS´ê de jî jêhatiye, wê gelekî muhtemelen namzet bê nîşandan.

Heta 15´ê Îlonê dem heye

Weke ya dilê xwe jî, Dagdeviren got, wê baş bûya ku di nava xelatgiran de jinek û keseke/kesekî ciwan jî hebe. Dagdeviren, wekî din ji bo namzetnîşandanê bang kir û got, heger keseke/î bi xebata xwe ya harîqulade hebe, dikare miracaet bike yan jî li ser navê wê/wî miracaet dikare bê kirin heta 15´ê Îlona 2018´an. Miracaet divê ji e-maila “[email protected]” bê şandin. Bi her miracaetê re divê jînenîgeriyeke kurt û nameya sedema namzetnîşandanê jî hebe.