Emîne Çelebî - Stenbol

Şanoya Destar, di dawiya vê heftê de  bi lîstika xwe ya nû ya bi navê "Cerb" derkete pêşberî qelabalixeke mezin. Ceribandina lîstikek bêgotin, di destpêka sala 2010'an de bi performanseke cidî derkete ser dika şanoyê.

Rastiya jiyanê, di nava demê de çawa mirovan diguherîne û dike dijberê rastiyên wî/wê bi xwe di lîstika bi navê cerb de, derdikeve pêş.

Çar mehkûmên di hucreyên xwe de, di nava tarîtî, reng û dengên zindana xwe de, her wiha di bin siya siya xwe de, tiştên li dijî xwe, dijberiyên xwe dilîzin. Digel dosyayên xwe yên têr û tije dixwazin xwe bijîn lê dem û hûrgiliyên di bin hişê wan de, ji nişke ve werdigerin dijberên wan. Ronahiya wan av e, pê hene. Carinan ji bo ko hebin şer dikin, carinan bi xeyalên xwe şad dibin.

Lîstik bi navê “Cerb” ceribandinek bêdeng e. Konseptek aîdî derhêner Mîrza Metîn e. Derhênerê lîstikê jî Mîrza Metîn bi xwe ye. 

Şanovan Mansûr Zîrek, Salman Akkuş, Cîhan Kuba û Hamza Guzel di lîstokê de performansek xurt nîşan didin. 

Teatra Destar di nava sala 2009'an hatiye avakirin. Destarê yekem lîstika xwe bi navê “Reşê Şevê” lîstik. “Cerb” lîstika wan a duyemîn e û taybetmendiyek wê heye ku cara yekem wekî şanoyeke kurdî ji Wezareta Çand Turîzmê ya Tirkiyeyê alîkarî girt. Lîstika ku li “Su Gosteri Sanatlari Merkezi” hate lîstik, di sala 2010'an de wê li gelek cihên din derkeve ser dikê.