Culemêrg
30 saziyên sivîl daxuyaniyeke weşand û xwest Waliyê û Midûrê Ewlehiya Culemêrgê, Qeymeqam û Midûrê Ewlehiya Geverê û hemû rayedar îstifa bikin.

Di 23'yê adarê de gel xwest Newrozê pîroz bike û ewlehiyê jî bi îdîaya qedexeye êrîşê gel kir. Di encamê de kesek binavê Îkbal Yaşar jiyana xwe ji dest da û gelek kes birîndar bûn.
Li ser vê yekê karsaz, nûnerên partiyên siyasî, rêxistinên kedê û rêxistinên girseyî yên demokratîk jî di nav de 30 saziyên civakî yên sivîl deklarasyonek hevpar weşand. Deklarasyon, bi beşdariya nûnerên saziyan li avahiya Rêxistina DTP'a Geverê hate xwendin. Daxuyanî ji aliyê Serokê Rêxistina DTP'ê Vahît Şahînoglu ve hate xwendin. Şahînoglu, diyar kir ku Newroz cejneke girîng e ku di jiyana gelê kurd de cih girtî ye. Şahînoglu, got ku ji berê de ye sîstem ji vîna ku di Newrozê de derketiye holê tirsiyaye û xwestiye cejnê tune bihesibîne û biçewsîne.

Di deklarasyonê de ev daxwaz cih girtin:

* Di serî de Waliyê Culemêrgê, Midûrê Ewlehiya Culemêrgê, Qeymeqamê Geverê û Midûrê Ewlehiya Geverê, hemû rayedar divê îstifa bikin.

* Divê kujerên Îkbal Yaşar bên eşkerekirin û cezaya ku heq dikin, bê dayîn.

* Kesên desteserkirî û girtî divê divê bêne berdan. Her wiha îşkenceyên di dema girtinê de hatine bêne tespîtkirin û der barê berpirsyaran de doz bê vekirin.

* Bedêla zirarên madî û manewî yên ku gelê Culemêrg û Geverê dîtiye, divê bi awayekî lezgînî bê dayîn.

* Divê der barê hêzên ewlehiyê ku di dema bûyeran de pêkanînên wekî hêza zêde, tehrîq û heqaret kirine de mumaleya zagonî bê destpêkirin.

* Divê sloganên wekî "Her tirk dema jidayik dibe leşker e", "Gever wê bibe ya me" ku ji aliyê hêzên ewlekariyê ve hatine qêrîn, bêne astengkirin, di berçav re bêne derbaskirin û der barê bepirsyaran de muameleya zagonî bê destpêkirin.

* Divê heqaretên li heyetên çavdêr ku ji derve hatine (parlementer, şaredar, berpirsyarên herêmê yên mafên mirovan û herwekî din) hatine kirin, bêne lêkolînkirin û der barê wan de muameleya zagonî bê destpêkirin.

* Divê texrîbatên li navçeyê çêbûne, bêne çêkirin.

* Divê bedêla zirarên madî û manewî yên gel bê dayîn.

* Divê çapemeniya netewî, xwedî berpirsyariyek wisa be ku ji bo aştiya civakî xizmet bike.

* Divê êrîşên li hemberî kedkarên çapemeniya herêmî bi dawî bibin û kesên ku ev êrîş pêk anîne, bêne darizandin.

* Divê berpirsyar ji ber pêkutî û zilma ku ji bo gelê me rewa dîtine, ji gel lêborîn bixwazin."

Ji DÎHA'yê hatiye girtin