ŞINE FAYÎQ/ SILÊMANÎ / ROJNEWS

Berpirsê ofîsa Baba Şêxê Êzidiyan li bajarokê Şêxan ê girêdayî bajarê Duhokê, Hadî Baba Şêx têkildarî êrîşên îro yên çekdarên binavê pêşmergeyên Rojava yên girêdayî PDK'ê dijî gelê Êzidî û şervanên YBŞ/YJŞ'ê ji bo ajansa me axivî.

Hadî Baba Şêx got; "Piştî fermana 3'ê Tebaxa 2014'ê ya li ser gelê Êzidî, zêdetirê 8 hezar jin û zarokên Êzidî ji aliyê çeteyên DAIŞ'ê ve hatin revandin. Hejmarek me ya zêde jî penaber û koçber bûn. Li rexmê vê jî niha cardin şer tînin Şengalê. Armanc jî ji bo cardin nehêlin gelê Êzidî vegerin Şengalê."

Baba Şêx wiha jî got; "Ev hêz ji bo fitne û hilkirina agirek nû çûne Şengalê. Ev hêz ger ji bo rizgarkirina Rojava diçe, wekî ew bi xwe dibêjin bila ji Rimêlan re biçin Rojava û Reqa rizgar bikin. Bila nekevin xaka Êzidiyan. Ger dibêjin em sînor diparêzin, bila neyên Şengalê, biçin cihek din biparêzin. Yên ku di 3'ê Tebaxa 2014'ê de Şengal neparastin, niha nikarin me biparêzin."

Herî dawî jî Hadî Baba Şêx wiha got; "Ger ji bo derxistina PKK'ê hatiye, derxistina PKK'ê ne di berpirsiyartiya wan de ye. Ev peywendî bi Iraqê ve heye, ne bi Rojava ve."

**

Nûçeya eleqedar:

- KCD: Êrîşa li hemberî Şengalê rawestînin 

- Baydemîr: Birakujî nayê qebûlkirin, vê rawestînin 

- Li Şengalê di navbera pêşmerge û YBŞ'ê de şer dest pê kir