Şengal

Li derdora bajarokê Xanasorê yê Şengalê di navbera hêzên YBŞ û pêşmergeyên Rojava de şer destpê kir û didome.

Îro saet ji 06:00'ê serê sibehê ve di navbera hêzên YBŞ û pêşmergeyên Rojava yên ku dixwestin bi zorê bikevin bajaroka Xanesorê ya Şengalê de şer derket.

Hêzên pêşmergeyên Rojava û hêzên Zêrevaniyê yên PDK'ê bi tang û çekên giran li malên sivîlên li Xanesorê didin.

Di encama topbaranên pêşmergeyên PDK'ê û komên girêdayî wê de, heya niha malên gelek welatiyên sivîl ên Xanesorê xera bûne. Her wiha welatî di malên xwe de ji ber topbaranê nikarin derbikevin.

Fermandara YJŞ'ê Rosyar Vejîn diyar kir ku hêzên PDK'ê li gel komên wan ên çekdar ji serê sibehê ve bi hemû çekên giran êrîşê Xanesor û Sinonê dike. Vejîn got ku ev êrîş encama hevdîtina Barzanî û Erdogan e. 

Vejîn wiha got; "Ji şevê din ve hêzên PDK'ê hêzek mezin sewqî Xanesor û Sinonê dikin. Her wiha bi çekên giran, wekî doçka, hewan, tang û ferdî êrîşê çeperên me dikin. Şerê li Xanesor û Sinonê didome."

Rosyar Vejîn wiha jî dewam kir; "Me heya deqeya dawî jî nexwest ku şer rû bide. Lê ew hatin û êrîşê herêmên dibin kontrola me de kirin. Pêşmergeyên Rojava ji wan kesan pêk tê ku xiyanet li Rojava kirine û di dema berxwedana Rojavayê Kurdistanê de revîne Başûr û niha dijî Şengalê şer dikin. Li gor agahiyên me girtine kesên xiyanet li tevgera azadî ya Kurdistanê kirine jî tevlî vî şerî bûne."

Rosyar Vejîn ev bang li gelê Êzidî kir; "Banga me ji gelê me yê Êzidî re li dijî van êrîşan bibin yek û xwedî li warê xwe derkevin. Divê gelê me bizane emê van cihan ji wan xayînan re nehêlin û heya dawiyê parastina gelê xwe bikin. Ev êrîş berhem û encamê hevdîtina Barzanî û Erdogan e."

Ji Rojnewsê hatiye girtin