Amed
Xwendekarên Komîteya Tenduristiyê ya MEGAM-DER'ê li gundan bi kurdî xizmeta tenduristiyê pêşkêşî gel kir. Gundiyên ku bi kurdî qala nexweşiya xwe kirin, kêfxweş bûn ku bi kurdî derdê xwe tînin ziman.

Xwendekarên Komeleya Navenda Lêkolîna Ciwanan a Mezopotamyayê (MEGAM-DER) li gundekê Karabaş a girêdayî navenda Amedê du rojan (rojên 2-3'yê vê mehê) xizmeta tenduristiyê pêşkêşî gundiyan kirin.

Xwendekarên ku di beşên diran, tib û hemşîretiyê de dixwînin roja pêşî ji bo gundiyan qala armanca xwe ya li gund kirin, bi wan re paqijiya derdorê kirin. Paşê dest bi nêrîna dev û diranên wan kirin. Piştî van yekan li ser qansêran pêsîrê bi jinan re axivîn û bersiva pirsên jinan dan.

Xwendekaran di roja duyem de jî mal bi mal geriyan û guhdariya derdê wan ê nexweşiyê kirin. Xwedekarên tenduristiyê asta şekir û tansiyona kesên bi ser temenê 35'an de pîvan, der barê diyabet û hîpertansiyonê de agahî dan wan.

Aliyê herî girîng ê xebatê ew bû ku xwendekaran bi kurdî bi gundiyan re têkilî danîn, gundiyan bi kurdî derdê xwe anîn ziman û kêfxweşiya xwe ji bo xebata wan bilêv kirin.

DÎHA