Diyarname

Roja 29'ê mehê di navbera Gençlerbirligi û Amed Sporê de li Enqereyê dê maça Kûpaya Ziraatê ya Tirkiyeyê bê lîstin. Di hemû maçan de bi awayekî normal her kes dikare here temaşe bikin lê Midûriyeta Emniyeta Enqereyê biryarek da ku li dinyayê mînakek wisa nîn e: "Kesên ne ji Amedê bin, nikarin herin maça Amedê temaşe bikin."

Li gor biryara emniyetê kesên ku di nasnameya wan de Amed nivîsandî be, yanê ji Amedê bin wekî temaşevanên Amed sporê dê bikaribin herin li maçê temaşe bikin lê kesên ne ji Amedê bin, alîgirê Amed Sporê bin jî dê nikaribin bikevin sehayê û li maçê temaşe bikin. Emniyetê ragihand ku ji ber ewlehiyê biryarek wisa girtine lê ji ber ewlehiyê be jî li dinyayê cudakirinek bi vî rengî tune ye. Qedexe hebe ji bo hemû temaşevanan qedexe ye, talûke hebe ji bo hemûyan talûke ye, lê ji Amedê be, ne Amedê be, dikare temaşe bike yan nikare li dinyayê mînakek wisa tune ye. Bi vê mînakê Emniyeta Enqereyê şêwazek nû xist nava dîroka fûtbolê!

'Tu agahî nedane me'

Di vê navberê re Klûba Amed Sporê daxuyaniyek nivîskî weşand, got li ser vê yekê tu agahiyek fermî nedane klûba wan û ji temaşevanan xwest herin Stada 19 Mayisê û piştgiriya tîma xwe bikin. 

Maça hefteya borî hatibû talûqkirin

Hefteya borî wekî maça sêyemîn a Maçên Koman li Amedê dê maça Amed Spor û Gençlerbîrlîgî bihata lîstin, ji ber wefata kaptanê Amed Sporê Şehmus Ozer ew maç ji bo demek din bi haş ve hat xistin. Ev maça niha di navbera Gençlerbirligi û Amed Sporê de dê bê lîstin wekî maça çaran a vê dorê ye. Amed Spor mecbûr e ji maçê pûan, an pûanan bi dest bixe. Ger pûanan negire derketina wê ya ji komê dijwar dibe. Ger Gençlerbirligi bi ser bikeve hema hema mafê derketina ji komê bi dest dixe.

Maç saet 14.30 de li Enqereyê tê lîstin.