Şirnex
5'emîn Festîvala Çand û Hunerê ya Berxbirê û Şahiyên Zozanan bi beşdariya 15 hezar kesî dest pê kir. Hemwelatiyên beşdarî festîvalê bûn bi slogan û dowîzan daxwazên xwe anîn ziman û li ber stranên kurdî govend girê dan.

5'emîn Festîvala Çand û Hunerê ya Berxbirê û Şahiyên Zozanan bi beşdariya 15 hezar kesî li Zozanên Şengalê dest pê kir. Parlementer, şaredar û rêveberên DTP'yî jî di nav de 15 hezar kesî daxwazên gelê kurd anîn ziman û riya çareseriyê destnîşan kirin. Di meşa kesk, sor û zer derketin pêş de sloganên, "Bê serok jiyan nabe", "Bijî Serok Apo", "Şehît namirin", "Bi can bi xwin em te re ne ey Serok", "PKK gel e gel li vir e" hatin avêtin. Girseya derket zozanên 2 hezar 200 metreyan bilind, li ber dahol û zirneyê govend girê da. Li qadê pankartên, "Em ne navnîşana lavakirinê navnîşana berxwedanê ne", "Ne îmha ne înkar Xweseriya Demokratîk", "Em dê bi berxwedanê serbikevin" hatin daliqandin û sloganên, "Bê Serok jiyan nabe", "Bijî serok Apo", "Şehît namirin" avêtin.

Li qada festîvalê ku leşkeran detbîrên berfireh girtin, li ketin û derketina qadê noqteyên kontrolê hatin danîn. Cerdevan, leşker û tîmên taybet li derdorê hatin cihkirin û li ser qada festîvalê re teyare hatin firandin. Li qada festîvalê ligel stanên xwarin, vexwarin, tedbîrên tenduristiyê, avdestxane jî hatin danîn. Jinan li ber konên ji mû hatin çêkiin, xwarinên kurdan ên kevneşopî çêkirin. Di çarçoveya bernameya festîvalê de bi beşdariya tevahiya girseyê ji bo şehîdên azadî û demokrasiyê rêz hate girtin. Piştre koma govendê ya şaredariyê lîstik pêşkêşkirin. Parlementera DTP'ê Sevahîr Bayindir û şaredarên DTP'yî bêrîvanên li Zozanên Laleşê ziyaret kirin. Her wiha Koma Sorxwîn, Koma Yekta, Koma Meyaser jî stranên xwe ji beşdaran re pêşkêş kirin. Girseyê li ber stranên koman govend girêdan. Her wiha skeçek balê dikişîne ser asîmîlasyona li hemberî kurdî jî hate pêşkêşkirin. Şaredarê Elkê Yusuf Temel diyar kir ku Laleş ji bo herêma wan pir girîng e û wiha axivî:

"Gelê kurd heta niha 72 caran rastî komkujiyan hatin. Gelê kurd xwezayiya xwe diparêze. Êdî kes nikare gelê kurd biçewisîne. Lazim e kesên bi vê xwenê dijîn hişyar bibin û mafên gelê kurd qebûl bikin. Pirsgirêka kurd jî dê bi diyalogê bê çareser kirin. Ji bo vê hewceye birayar bêçalaktiyê ya PKK'ê bê bersivandin."
Serokê Rêxistina DTP'ê ya Şirnexê jî diyar kir ku axa Mezopotamyayê ya pîrozewer axa gelê kurd e û wiha got: "Ziman, çand û hebûna me qedexe kirin. Em înkar kirin û xwestin me ji holê rakin. Lê tu hêz nikarin gelê kurd biçewisînin. Ev 35 sale têkoşîna azadiyê tê dayîn. Gelê kurd bi berxwedana xwe îro tê nasîn. Êdî tu hêz nikarin pêşiya me bigirin. Pirsgirêka kurd jî ku tê xwestin bê çareserkirin, muhatab Birêz Ocalan e. Ji bo vê jî lazim e êdî bersiva biryara bêçalaktiyê ya PKK'ê bê dayîn."

Parlementera DTP'ê Sevahîr Bayindir jî balkişand ser zêdebûna têkoşîna gelê kurd û ev tişt gotin: "Gelê kurd di nav 30 salan de bexwedanek bêhempa nîşan da û nirxên mezin afirandin. Nirxên di encama vê berxwedanê de derketine holê niha bûye çandek. Pêşengê vê berxwedanê jî Rêberê PKK'ê Abdullah Ocalan e. Di hilbijartina 29'ê adarê de jî derkete holê ku ev ruh ji holê nayê rakirin û îradeya gelê kurd teslîm nayê girtin."
Bayindir bi bîr xist ku Ocalan dê di 15'ê tebaxê de nexşeyek rê aşkera bike û wiha domand: "Lê li hemberî serketina gelê kurd 300 endamên partiya me girtin, hemwelatiyên me li Mêrdînê qetil kirin. Serokwezîr ji bo çareseriyê diçe Amerîkayê. Em dibêjin werin cem me, em bi hev re çareser bikin." Bayindir diyar kir ku muhatabê çareseriyê Ocalan e.

Piştî axaftinan hunermend Seyda Perînçek derket ser dikê. Her wiha Koma Kato stranên xwe bi beşdaran re parvekirin.

Ji DÎHA'yê hatiye girtin