Diyarname

Amed Spor di Koma Spî ya Lîga 2'yemîn a Tirkiyeyê de dilîze îro di maçên hefteya 11'emîn de li hemberî Buca Sporê lîst û bi 3-0 bi ser ket. Bi vê serketinê Amed Sporê îsal yekemîn car bû lîderê lîga xwe.

Amed Sporê îro li Îzmîrê ligel Buca Spokrê lîst. Amed Sporê di deqîqeya 25'an de bi gola Ahmet Guven 1-0 bi ser ket û di deqîqeya 40'î de dîsa Ahmet Guven gol avêt û nîveka yekemîn bi 2-0 bi dawî bû. Di nîveka duyemîn de Deniz Naki di deqîqeya 51'ê de ji penaltiyê gol avêt û maç bi vî awayî bi dawî bû. Bi vê sê pûanên Amed Sporê girtin pûanên xwe derxist 24'an û ji ber lîderê hefteyê berê Îstanbul Spor îro têk çû, lîderê nû bû Amed Spor.

Amed Spor di van 11 hefteyan de 7 caran bi ser ketiye, 3 caran wek hev û carek jî têk çûye. Hefteya pêşiya me (13'yê mehê,saet 13.00) Amed Spor dê li mala xwe ligel Of Spor AŞ'yê bilîze.

Amed Spor ku serê salê bi diruşma şampiyoniyê dest bi lîgê kir yekem car bû lîder. Di Lîgên 2'yem Komên Spî û Sor de kîjan tîm bibe şampiyon raste rast derbasî Lîga 1'emîn dibe, yên duyemîn heta 5'emîn play-offê dilîzin.