Îzmîr
Navenda Çanda Mezopotamyayê ya Îzmîrê ji bo konsera Koma Rewşen, Rojda û Mehmet Atli destûra Şanogeha Servekirî ya Fuarê ji Şaredariya Bajarê Mezin a Îzmîrê girt. Rayedarên navendê diyarkirin ku piştî nêzîk 50 hezar TL mesref kirine, li ser zordariya polîsan konsera wan hatiye betalkirin. NÇM amadekariya vekirina dozê dike.

Navenda Çanda Mezopotamyayê (NÇM) ya Îzmîrê ji bo konsera Koma Rewşen, Rojda û Mehmet Atli ya di 20'ê pûşperê de destûra Şanogeha Servekirî ya Fuarê ji Şaredariya Bajarê Mezin a Îzmîrê girt. Lê hate îdîakirin ku li ser zordariya Midûriyeta Polîsan a Îzmîrê konser hatiye betalkirin.

Xebatkarê NÇM'a Îzmîrê Veysî Guneş li ser qedexeya konserê axivî. Guneş diyar kir ku ji bo konserê serî li Şaredariya Bajarê Mezin a Îzmîrê dane.
Guneş da zanîn ku li ser hemû mijaran li hev kirine û peyman çêkirine. Guneş anî ziman ku piştre rayedarên şaredariyê li wan geriyaye û diyar kirine ku destûrê nadin. Guneş wiha axivî: "Li ser vê yekê em bi Sekretera Giştî ya Şaredariyê û Seroka Daîreya Çand û Hunerê Hulya Guven re axivîn. Me zanî ku rayedarên polîsan ketine navberê. Polîsan konsera me par ji bo Rojda amadekirî wekî hincet nîşan da û sloganên hatine avêtin jî wekî sedem daxuyandine. Polîsan xwestiye ku cihê konserê neyê dayîn. Rayedarên şaredariyê jî ev daxwaza polîsan li ber çavan girtine."
Guneş diyar kir ku 13'yê gulanê de piştî destûra pêwîst standine heta niha 47 hezar TL lêçûyînên wan pêk hatine û ev tişt gotin: "Sedema betalkirinê tevahî polîs in. Zirara me çêbûye. Li hemberî komeleya me cotstandardî heye. Şanoya Servekirî didin her kesî. Lê dema mijar dibe kurd, astengiyan derdixin. Piştî Qada Gundogduyê, Şanoya Servekirî jî ji kurdan re qedexe kirine. Ev astengî ji ber sedemên îdeolojîk pêk tên. Em dê serî li riyên hiqûqî bidin."

Ji DÎHA'yê hatiye girtin