Diyarname

TUÎK'ê hê nû hejmara pirtûkên ku hatin çapkirin eşkere kir: Di sala 2015'an de 49 hezar û 148 heb pirtûk li Tirkiyeyê hatine çapkirin.

Saziya Îstatîstîkê ya Tirkiyeyê (TUÎK) ku di gelek waran de îstatîstîkan diweşîne vê carê îstatîstÎkên li ser pirtûkên li Tirkiyeyê hatine çapkirin weşand.

Ew dibêje li gor sala 2014'an di hemû meteryalan de sedî 11,2 zêdebûn. Herî zêde jî di warê pirtûkên elektronîk de zêdebûn çêbûye: Sedî 21,8. Sala 2015'an de bi giştî 6 hezar û 389 pirtûkên elektronîk hatine çapkirin, 539 DVD, VCD yan jî di formata CV de û 103 heb jî pirtûkên bi deng hatine çapkirin.

Ji pirtûkên hatine çapkirin sedî 27,6'ê wan pirtûkên perwerdehiyê, sedî 20,1 wêje, sedî 19,7 çand, sedî 14,6 pirtûkên zarok û ciwanan, sedî 12,1 akademîk û sedî 6 jî pirtûkên li ser baweriyan hatine çapkirin. Her wiha sedî 89 zimanê pirtûkan bi tirkî, sedî 5,3 bi îngilîzî hatine çapkirin.

TUÎK li gor ISBN'yan hejmara pirtûkan diyar dike. Di nav îstatîstîkên TUÎK'ê de cih nagirin lê li gor lêkolîna Diyarnameyê par li dor 250 heb pirtûkên bi kurdî hatine çapkirin.