AMED (DÎHA)

Serokê ÎHD'ya Amedê Racî Bîlîcî diyar kir ku Lijneya Wezîran bi biryara "îstîmlaqkirinê" ya ji bo Sûrê biryara qirkirina çandî girtiye û bi vî rengî tê xwestin hafizeya bajar bê tunekirin.

Komeleya Mafên Mirovan (ÎHD) a Amedê li ser biryara "îstîmlaqê" ya ku ji aliyê Lijneya Wezîran ve ji bo Sûra Amedê hatiye girtin li avahiya komeleyê civîna çapemeniyê li dar xist. Serokê ÎHD'ya Amedê Racî Bîlîcî axivî û got ku li Sûrê qedexeya ku di gelawêja 2015'an de dest pê kir û heta adara 2016'an berdewam kir di dema pêkanînan de bi sedan sivîl hatin qetilkirin, bi hezaran mal û kargeh hatin xirakirin. 

Bîlîcî diyar kir ku di nava vê demê de dîmenên nehiqûqî, nemirovî jî derketine holê.

'Biryara îstîmlaqê nehiqûqî ye'

Bîlîcî got ku Lijneya Wezîran di 21'ê adara 2016'an de ji bo hema hema tevahiya Sûrê biryara "îstîmlaqê" girtiye û ev biryar jî li gorî madeya 27'emîn a Qanûna îstîmlaqê hatiye girtin. Bilîcî wisa got: "Ev pêkanînên nehiqûqî qaşo li gorî qilifê qanûnî pêk anîn, ev binpêkirina mewzûatê û nirxên hiqûqî yê gerdûnî ye. Hiqûqa gerdûnî li aliyekî, mewzûata neteweyî jî binpêkirina azadî û mafên bingehîn qedexe dike. Biryara îstîmlaqkirina Sûrê bi awayeke eşkere binpêkirina 'mafê milk', 'binpêkirina qedexeya cudaxwaziyê' ye. Ev yek zelal e."

'Li Sûrê cihên saxlem jî tên xirakirin'

Bîlîcî da zanîn ku ev biryara ku ji bo Sûrê hatiye girtin rojanekirina Plana Islahatê ya Şarqê ye, welatiyên li Sûrê careke din jî bi polîtîkayên tehcîrê re rû bi rû ne. 

Serokê ÎHD'ya Amedê Bîlîcî destnîşan kir ku di pêvajoya ku operasyon berdewam dikir de bi weşanên çapemeniyê yên nêzî hikumetê zemîna vê ya psîkolojîk hate amadekirin, "Plana Masterê ya têkoşîna bi terorê re" ji aliyê Serokwezîr Ahmet davutoglu ve hate rojevê, piştî ku pevçûn bi dawî bûn jî hikumetê ev proje xistiye dewreyê. Bîlîcî anî ziman ku malên saxlem jî tên xirakirin û bi kamyonan xurdik tên kişandin. 

Racî Bîlîcî anî ziman ku biryara îstîmlaqkirinê bi hezaran welatiyên Sûrê bi zorê ji cih û warên xwe tên derxistin, bi qirkirina çandî re jî tê xwestin hafizeya bajar bê tunekirin. Bîlîcî diyar kir ku cewherê dîrokî di bin tehdîdê ye û divê ev biryara hatiye girtin bê betalkirin.