Diyarname

Vê dema dawî gelek kesan dest pê kiriye ku bi kurdî an dersên zimanên biyanî an jî bi zimanên biyanî dersên zaravayên kurdî bidin. 

Bi belavbûna medyaya civakî di nav kurdan de, xebatên înternetî yên fêrkirina kurdî bi şêwezarên xwe yên cuda û her wiha ya zimanên cuda zêde bû. Li aliyek saziyên ku xebatên wan ên bi vî rengî hebûn ji ber vê serdemê ew xebat derxistin nav online, li aliyê din jî kesan dest bi xebatên wisa kirin. Em hemû xizmetên ji bo kurdî baş dibînin û dixwazin pêş bikevin. Ji bo vê me lêkolînek li ser wan kir û hin tesbît kirin, em dixwazin wan bi we bidin nasîn:

Xebatên saziyan ên ser online

- Koma Enstîtuya Kurdî li Stenbolê li avahiya xwe dersên kurdî didan, lê ji ber vîrusa koronayê niha bi ser înternetê re dersê dide û li gor daxuyaniya wan li dor hezar kesî serî li wan dabû û ew derdê didin.

Ji bilî vê bi navê "fêrgeha kurdî" (@fergehakurdi) hesabek heye wisa diyar e ji aliyê mamosteyên Enstîtuyê ve hatiye amadekirin û ji ser wê hefteyê sê rojan dest bi dayîna dersan kiriye.

- Dibistanên li Rojava dest bi dersên bi ser înternetê re kirin. Zanîngeha Rojavayê Kurdistanê jî ligel Zanîngeha INALCO'yê bi ser înternetê re dest bi dersan kir û xebata wan heta 15'ê gulanê didome.

- INALCO niha xwe amade dike di serdema pêşiya me de dersên din bide û ji bo vê niha serîlêdanan digire.
- Her wiha Med-Der (@MEDDER10) ku li Amedê ye wan jî xebateke online daye dest pê kirin û niha yên bixwazin navên xwe qeyd dikin. 

- Adar Sprachschule (xwendegeha zimanan) kurdisch-lernen.de jî heye. Ew ji sala 2016'an ve bi 2 zaravayên kurdî (Kurmancî-Soranî) kurdî fêr dike. Hînkirina kirmanckî (zazakî) jî di demeke nêz de li ser xetê (online) dest pê bike.
Xwendegeha Adar heta asta C2 bawernameyê dide beşdaran.

BaKuZiB (Bawernameya Kurdî wek Zimanê Biyanî-Zertifikat Kurdisch als Fremdsprache) e-mail: kurdi@kurdisch-lernen.de

Hesabên kesan ên online

- Hesabek heye ku kurmancî bi îngilîzî fêr dike. Niha bi ser 12 hezar kesî re şopînerên wê çêbûne. Navê hesabî @kurdishlessons e. 

- Hesabekî din bo fêrkirina şêwezarê kirmanckî heye ku navê wê @learn_zazaki ye.

 Du hesabên din hene ji bo fêrkirina zimanên biyanî ne.

- Yek bo fêrkirina îspanî ye ku navê wê @espanolporkurdi ye

- Hesabê din jî ji bo fêrkirina yewnanî ye ku navê wê jî @YewnaniBiKurdi ye. 

- Hesabek din heye navê "dûreders" li xwe kiriye û bi kurdî dersê dide. Ji hesabê diyar e ji bo yên kurdî nizanin ji ser tirkî re dê dersa kurdî bide. Navnîşan ev e: @dureders

Hinek ji van hesaban nû ne û hîn ne diyar ka çiqasî dê xebatên xwe bidomînin.

Têbiniya Diyarnameyê: Hesabên ku me ji bîr kiribin hebin xebera me pê bixin emê li nûçeyê zêde bikin.

Ev xêza Dogan Guzel e, ji bo bikaranînê pêdivî bi destûra wî heye.

 **

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.