Diyarname
Weşanxaneya Avestayê di bin navê weşanxaneya "Hêlînê" de dê pirtûkên zarokan biweşîne. Yekem pirtûk di Newrozê de tê.
Par me nûçeyeke bi navê "Weşanxaneyên kurdan ji bo zarokên kurdan çi dikin?"* û di nûçeyê de em li ser çima pirtûkên zarokan li Tirkiyeyê nayên weşandin sekinîbûn. Di heman demê de me dîtina edîtorên weşanxaneyên kurdan pêşkêş kiribû. Di nûçeyê de Xwedî û edîtorê Weşanên Avestayê Abdullah Keskin wisa gotibû. "Vê payîzê em dest bi weşandina pirtûkên zarokan dikin. Ji bo vê me navê ‘Hêlîn’ li weşanxaneyê kir û di bin vê de dê pirtûkên zarokan bêne weşandin." Hinek bi derengî be jî Avestayê niha "Hêlîn" ava kir û di vê Newrozê de dê dest bi weşana pirtûkên zarokan bike.
Li gor agahiyên ku Weşanxaneya Avestayê pêşkêş kirin dê di Weşanxaneya Hêlînê de tenê pirtûkên zarokan bêne weşandin û yekem pirtûk jî dê Newrozê de derkeve pêşberî xwendevanan. Li ser "Hêlîn"ê û berhemên ku dê derxin Avestayê wisa got: "Kitêba yekemîn wergereke Celadet Alî Bedirxan a bi navê ‘Conî û Cimêma’ ye ku di sala 1943'yan de di nav Kitêbxana Hawarê de tenê 15 heb hatibûn çapkirin e. Nivîskarê kitêbê Bryan Guinnes e û Celadet Beg ew ji fransî wergerandiye. Kitêba duyem a Mustafa Uzun ‘Newroz’ e. Ilustrasyonê ‘Newroz’ê ji aliyê Wolf Dieter Kopfer ve hatine çêkirin. Kitêba sêyemîn klasîkeke girîng e: Serpêhatiyên Tom Sawyer. Nivîskarê wê Mark Twain e. Tom Sawyer, Ergîn Opengîn ji îngilîzî wergerandiye."
Li gor ku Avesta dibêje dê di Hêlînê de ji pirtûkên alfabeyê heta bi xêzeromanan, çîrokên kurdî û ên dinyayê, kitêbên fêrkirina jiyanê, materyalên dersê, rengîn û reş û spî, ji bo her kategoriya temen û bi ebadên cihê ê çap bibin."
Her wiha hate gotin ku Hêlîn dixwaze her meh bi kêmanî kitêbeke zarokan biweşîne.
Wekî notek: Li Tirkiyeyê bi giştî weşanxaneyên kurd dûrî weşandina pirtûkên ji bo zarokan in. Hema bibêje salê yek jî pirtûkek ji bo zarokan naweşînin/neweşandine. "Hêlîn" di vî warî de gaveke nû û girîng e. Em wekî Diyarname hêviya serketinê ji bo Hêlînê dikin.
30.06.2008, Weşanxaneyên kurdan ji bo zarokên kurdan çi dikin?, Diyarname
***
Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.