QAMIŞLO
Hevgirtina Rewşenbîrên Rojavayê Kurdistanê (HRRK) ji bo Cejna Zimanê Kurdî şevbuhêrka helbestan û ahenga îmzekirina pirtûka “Netewperwerî Di Helbestên Mele Mihemedê Palo De” ya Yasmîn Ebas li dar xist. Rewşenbîr, helbestvan, zimanzan û mamosteyên Zanîngeha Rojava tev li çalakiyê bûn. 

Di çalakiyê de helbestvan Rewan Bedirxan helbestên “Çima” û “Hey Jînê”, Ebdurehman Silo helbesta “Zimanê Kurdî” û “Kurdistan”, Diyala Elî helbesta “Xanî”, Izeddîn Silêman helbesta “Zimanê Kurdî Bê Nav”, Mihemed Ebdo helbesta “Mizgîniya Ava Mezin” xwendin. 

Piştî xwendina helbestan ahenga îzmekirina pirtûka “Netewperwerî Di Helbestên Mele Mihemedê Palo De” ya nivîskar Yasemîn Ebas pêk hat. Pirtûka Ebas a lêkolînî ji 139 rûpelan pêk tê ku di sala 2025’an de ji aliyê Weşanên HRRK’ê ve, li Qamişloyê hatûiû çapkirin.

Nivîskar Yasmîn Ebas berî îmzekirina pirtûkê axivî û pasiya mamosteyê Zanîngeha Rojava, malbata Mele Mihemedê Palo û kesên beşdar kir. Yasmîn Ebas diyar kir ku ji ber keda Mele Mihemedê Palo di wêje û zimanê kurdî de wê xwestiye pirtûkê li ser keda wî binivîse.

Ebas qala jiyana Mele Mihemedê Palo jî kir. Mele Mihemed di sala 1920’î de li gundê Palo yê Sêraçurê hatiye dinê. Di zarokatiya xwe de sêwî dimîne, jiyanek di nava hejariyê de dijî. Di sala 1935’an de diçe bajarê Qamişloyê. Mele Mihemedî gelek berhem li pey xwe hêlane, lê dîwanên wî yên bi navê “Dewr û Gera Kurdistanê”, “Rêzimana Kurdî”, “Civîna Nemiran” hatine çapkirin. Mele Mihemed sala 1991’ê li gundê Cirnikê yê Qamişloyê miriye.

Di pirtûkê de nivîskar ji Serhildana Şêx Ubeydullahê Nehrî (1980) heta Damezrandina Komara Mihabadê (1946), Peymana Lozanê (1923), Komkujiya Helebceyê (1988) qal kiriye, dîsa qala teoriya netewperweriyê dike. Di berhemên Mele Mihemed de qala van kiriye. Her wiha bandorbûna Mele Mihemedê Palo ji serhildanan û rengvedana netewperweriyê di helbestên wî de nivîsiye. Her wiha cih daye berhemên Mele Mihemed Palo. 

Yasmîn Ebas kî ye?
Nivîskar, lêkolîner Yasmîn Ebas di sala 2003’yan de li gundê Dugirê yê Tirbespiyê ji dayîk bûye. Heta dibistana Amadeyî li Tirbespiyê xwendiye. Li Zanîngeha Rojava Beşa Wêjeya Kurdî (Qamişlo) xwendiye. Ev pirtûka wê ya yekem.