Diyarname
Maradona ku hefteya borî gotibûn dê bibe teknîk dîrektorê Arjantînê duh peyman îmze kir û hat peywirdarkirin.

Di merasima îmzekirina peymanê de Serokê Federasyona Futbolê yê Arjantînê Julio Grondona, Menejerê Giştî yê Tîma Futbola Neteweyî ya Arjantînê Carlos Bilardo jî amade bûn.
Maradona da zanîn ku ev kar ji bo wî rûmetek e û xeyala wî hatiye cih.

Grondona jî da zanîn ku gotinên Maradona ji bo teknîk dîrektoriyê têrê nake ne di cih dene û em bi Maradona bawer in.

Lîstikvanê berê, teknîk dîrektorê nû Maradona yê 48 salî di sala 1976'an de li Argentinos Juniorsê dest bi futbolê kir û bi rêze di van tîman de cih girt: Boca Juniors, Barcelona, Napoli, Sevilla, Newell's Old Boys û dîsa Boca Juniors

Maradona di navbera 1977-1994'an de 94 caran formaya tîma neteweyî ya futbolê ya Arjanjînê li xwe kir û bi giştî 34 gol avêt. Her wiha kir ku welatê wî di sala 1986'an de li Kûpaya Cîhanê ya li Meksîkayê bibe bibe Şampiyona Cîhanê.

Maradona li welatê xwe wekî lehengê neteweyî tê nasîn. Her wiha têkiliya wî ya bi Serokê Kubayê Fidel Castro û rêberên çepgir ên dinyayê yên din re jî heye.

Tîma Arjantînê di bin rêveberiya Maradona de yekem car dê 19'ê mehê li Skoçyayê maçeke dostane bilîze.