Diyarname
Documentaristeke din jî bi dawî bû. 90 belgefîlm hatin nîşandayîn û "Beklemek" (Li bendemayîn) ê Bulent Ozturk hat xelatkirin.

Rojên Belgefîlman a Stenbolê Documentarist îsal 5'emîn car li dar ket. Di Documentaristê ku di navbera 1-6'ê vê mehê li dar ket de kurdî jî têde bi gelek zimanan nêzî 90 belgefîlmî hatin nîşandayîn.
Li Tirkiyeyê her ku diçe eleqeya ji bo belgefîlman zêde dibe. Vê yekê xwe di temaşekirina belgefîlman de nîşan da. Li gor par û salên borî îsal zêdetir kes di seansên temaşekirina belgefîlman de hebûn.
Documentarist li ser belgefîlman pêşbazî li dar naxe lê juriya Documentaristê xelata JVDK (Johan van der Keuken) dide belgefîlmê derhênerek ku divê ew belgefîlmê wî/ê yekemîn an duyemîn be. Îsal jurî ji Ozgur Dogan (Derhêner), Firat Yucel (Rexnegirê Sînemayê), Pinar Ogunç (Rojnameger-nivîskar), Eleni Varmazi (Akademisyen) û Feride Çiçekoglu (Senarîst-Nivîskar) pêk dihat. Juriyê xelat da belgefîlmê Bulent Ozturk "Beklemek". Ozturk 1000 Euro pere wekî xelat girt. Her wiha juriyê Xelata Mansiyonê jî da fîlmê Ebubekir Çetinkaya ê bi navê "Yuva".
"Beklemek" (Li bendemayîn) bi kurdî û tirkî ye. Belgefîlm piştî erdheja Wanê ya rezbera 2011'an hatiye kişandin, hewldana li jiyanê mayîna gelê wê derê û têkoşîna wan a jiyana rojene nîşan dide. Belgefîlmê 51 deqîqeyî di Rojênbelgefîlman a TRT'ê de jî Xelata Belgefîlmê Herî Serketî girtibû.

Di Documentaristê de digel nîşandayîna belgefîlman, dersên sînemayê, gotûbêj û panel jî li dar ketin.

Di nav belgefîlman de belgefîlmê Rodi Yuzbaşi ê bi kurdî "Maya", "Rezonse" ê Pîran Baydemîr, "Ez firiyam tu mayî" yê Mizgîn Mujde Arslan, "Dengê Derî" yê Metin Çelik û Halil Firat Yazar jî hat nîşandayîn.

Documentarist êvara 6'ê mehê bi merasimeke li Navenda Çanda Fransizê bi dawî bû û sala bê dîsa heman mehê dê li dar bikeve.