Amed
Cîgirê Serokê Koma Meclisê ya DTP'ê Selahattîn Demîrtaş, di Konferansa "Avakirina Aştiya Civakî: Lêgerîna Bo Makezagonek Sivîl" de axivî û got: "Erdogan dibêje hûn jî hene di nav miletê de. Başe dîroka me li ku ye? Ew dibêje tekane dîrok. Lê kurd tunene di nav vê dîrokê de. Tunehesibandin hê jî didome."

Konferansa "Avakirina Aştiya Civakî: Lêgerîna Bo Makezagonek Sivîl" ku ji aliyê Baroya Amedê û Komeleya Heinrich Böll ve hate lidarxistin îro bi dawî bû.
Di rûniştina dawî ya konferansê de Cîgirê Serokê Koma Meclisê ya DTP'ê Selahattîn Demîrtaş, Kurşat Bumîn û Parlementerê AKP'ê yê Amedê Abdurrahman Kurt axivîn. Kurt, anî ziman ku tundiya ji sala 1999'an û vir ve rawestiyaye, di pêvajoya dawî de ji nû ve zindî bûye. Abdurahman Kurt gotina "Di dem û dewrana ragihandin û teknolojiyê ya em tê de ne, êdî di mercên Tirkiyeyê de asîmîlasyon nabe" bikar anî û got ku êdî ne mumkun e kurd bêne asîmîlekirin. Kurt li ser zagoneke bingehîn ya nû jî wisa got: "Zagoneke bingehîn ku di nav sloganên 'Şehîtler olmez' û 'Şehîd namirin' de bê avakirin ez ne pir bi hêvî me."

Cîgirê Serokê Koma Meclisê ya DTP'ê Selahattîn Demîrtaş jî got ku pirsgirêka kurd, pirsgirêkek zagona bingehîn e. Demîrtaş, diyar kir ku pirsgirêka azadiyê ya Tirkiyeyê ne tenê têkildarî kurdan e, hemû kesan eleqedar dike û wiha berdewam kir: "Pirsgirêkek azadiyê ya Tirkiyeyê heye."
Demîrtaş, gotinên mebûsê Ak Partî Kurt yên der barê asîmîlekirina kurdan de rexne kir û wiha got; "Di pirtûkên dîrokê yên lîseyê de ji dîroka cîhanê mînak hene, lê der barê dîroka kurdan de agahiyek tune ye. Serokwezîr Recep Tayyîp Erdogan di axaftina ji bo netewa Tirkiyeyê 'milet' bikar tîne. Birêz Erdogan dibêje hûn jî hene di nav miletê de. Baş e dîroka me li ku ye? Ew dibêje tekane dîrok. Lê kurd tunene di nav vê dîrokê de. Tunehesibandin hê jî didome."

Nivîskar û rojnameger Kurşat Bumîn jî got ku Demîrtaş polîtîkavanek bê hêvî ye. Bumîn, diyar kir ku divê tiştên bûyîne bêne jibîrkirin û li tiştên ku ji niha û pê de divê bêne kirin bê nihêrtin. Bumîn, wiha dom kir: "Dewlet, nikare di raporên xwe yên veşarî de jî bêje kurd. Dibêje yên ku dibêjin qey kurd in. Divê em Zagoneke Bingehîn ku peyva tirk tê de derbas nabe bixwazin. Divê em nebêjin tirk hebe gerek kurd jî hebe."

Ji DÎHA'yê hatiye girtin