Diyarname

Hevserokê HDP'ê Selahattin Demirtaş di civîna koma meclisê de axavî, bersiv da Bulent Arinçê ku dema qala Cizîrê kiribû gotibû "Emê Cizîrê ji eşqiyayan paqij bikin". Demirtaş wisa got: "Belê beşa gere mirov Cizîrê ji eşqiyayan paqij bikin rast e. Ez di vir de beşdarî Arinç dibim. Bi taybetî hûn wekî AKP, eşqiyayên ku we ji derve bi taybetî anîne û hûn xwedî dikin, dê gelê Cizîrê ji van eşqiyayan rizgar bibin. Ji vê bawer bin, eşqiyayên we destûr bidin emê zûtir Cizîrê paqij bikin. Ne tenê Cizîrê, emê hemû Tirkiyeyê ji eşqiyayên AKP'ê rizgar bikin."

Demîrtaş yek ji guleyên ku ji serê Nihat Kazanhanê 12 salî ketibû jî nîşan da

Vane hin gotinên Demîrtaş ên di civînê de:

Şaredariyên HDP'ê dê cemxaneyan qebûl bikin

- Em ligel nûnerên sazî û Konfederasyonên Elewî re hatin ba hev. Hevdîtineke baş bû. Mafê kesî tuneye nîqaşa Cemxane îbadetxane ye yan na bike. Dewlet cemxaneyan wekî îbadetxane nas nake. Ji ber vê yekê jî deynên elekrît û avê yên cemxaneyan tên û ew jî nikarin bidin. Li ser vê dewlet heczê bi ser wan de dişîne. Ez bi taybetî ji Serokê Karên Diyanetê dipirsim, dema tu ji ew erebeya xwe ya luks ji derve dinêrî, tu vê bêedaletiyê dibînî?

Me biryar daye ku em vê pirsgirêkê ligel şaredariyên xwe çareser bikin. Şaredariyên me dê cemxaneyan bi awayekî fermî wekî cihê îbadetê biperijînin û xizmetên şaredariyê bê pere ji bo wan bikin. Barê dikeve ser milê me emê bikin, lê berpirsê sereke hikumet e.

Serokê Baroyê ji ber karê xwe kiriye tê cezakirin

Serokê Baroya Dêrsimê parêzer Ugur Yeşîltepe ye. Wî ji ber ku karê xwe kir, doz şopandin, muwekîlên xwe parastin, ji ber nêzîkatiya wî ya ji bo meseleya mafên mirovan, 9'emîn Daîreya Cezayên Giran 6 sal û nîv cezayê hepsê lê biriye. Çawa hûn nikarin ji dixtorek re bibêjin te çima li tansiyona nexweş nêrî, hûn nikarin ji parêzer re bibêjin te çima wisa kir. Ev dosya divê di cih de ji bo betalkirinê bê şandin. Emê vê dozê bişopînin.

Emê hesabê karên nelirê bipirsin

Dibêjin çima ji komîsyona li ser karên nelirê yên çar wezîran we endamê xwe bi paş ve kişand. Ji ber ku me dît komîsyon tenê dixwaze wezîran paqij nîşan bide, me nexwest bibin şirîkê vê yekê. 

Heta niha me tu demê ev karên nelirê piştguh nekirine, emê ji niha û pêdê jî nekin. Li parlemenê çi ji destê me bê emê bikin. Heta hesab bê pirsîn emê li dû bin. Roj bê, dewran dema biguhere HDP ev dosyaya ku serê wê hatibe nixumandin jî dê ji nû ve veke.

Her wiha Demîrtaş careke din Hrant Dînk bibîr anîn, di axaftina xwe de wekî din li ser pirsgirêkên mêşvanan (yên li ser karê hinguvê dixebitin) û li ser pirsgirêka mamosteyên ku tayînên wan nayê kirin jî sekinî.