Di 23'yê mehê de jî li gelek bajaran Newroz hate pîrozkirin. Vane pîrozbahiyên îro:

Sêrt

Ligel barana zêde jî deh hezar kes li Sêrtê ji bo pîrozbahiya Newrozê hatin cem hev.
Di pîrozbahiyê de  Hevserokên DTP'ê Ahmet Turk, Emîne Ayna, parlementerê DEP'ê yê berê Hatîp Dîcle, parlementer û şaredarên DTP'yî amade bûn. Piştî rêzgirtina ji bo şehîdên demokrasiyê Berendamê Sêrtê Selîm Sadak gel silav kir û agirê Newrozê pê xist.

***

Tetwan

Li Navçeya Tetwana Bedlîsê di seatên serê sibê de gel bi armanca pîrozkirina Newrozê li ber avahiya DTP'ê hate cem hev. Bi hezaran kesên li ber dahol û zirneyê govend girêda, bi beşdariya rêveberên navçe û bajarokan ên DTP'ê re ber bi qada Newrozê dest bi meşê kirin. Di pîrozbahiya li Qada Fuarê de pankartên, "Em bi agirê Newrozê rojê silav dikin", "Newroz pîroz be" hatin vekirin.

***

Elbak

Li navçeya Elbaka Wanê jî ku yekemîn car agirê Newrozê lê bilind dibe, bi hezaran jinên kincên neteweyî li xwe kirin, li ber avahiya DTP'ê hatin cem hev. Girseya li vir demekê govend girê da, piştre ber bi qada li cem Dibistana Leylî ya Herêmê ve dest bi meşê kir.
Girse piştî di noqteyên lêgerînê de derbas bû, kete qada mitîngê. Di mitînga zêdeyî 10 hezar kesî beşdar bûyî de piştî axaftin û vêxistina agirê Newrozê girseyê li ber stranên kurdî govend girêda.

***

Isparta

Li Ispartayê jî Newroza ev 4 sal in destûra pîrozkirinê nayê dayîn, îsal ligel hemû zordariyan jî hate pîrozkirin. Di pîrozbahiya li Taşa Gulistanê pêk hatî de hezaran kes hatin cem hev.

***

Gihadîn

Parlamenterê bere yê DEP'ê Hatîp Dîcle ku tevlî pîrozbahiya Newrozê ya li Navçeya Gihadîn a Agiriyê bi tevlîbûna 5 hezar kesan hate lidarxistin bû, bal kişand ser dîroka Cejna Newrozê û wiha got: "Kawayên nûdem ên kurdan hene. Lê bi qasî Kawayên nûdem Dehaqên nûdem jî hene. Berî niha wekî Suleyman Demîrel derket pêşberî me, îro jî wekî Recep Tayyîp Paşa derdikeve pêşbarî me."

***

Altinoluk

Di pîrozbahiya Newrozê ya li Bajaroka Altinoluk a Balikesîrê hate lidarxistin de gelek kes hatin cem hev.
Rêxistina DTP'ê ya Bajaroka Altinolukê, li Salona Dawetê ya Altinolukê şahiya Newrozê lidar xist. Endamên DTP'ê û 600 kesên din tevlî şahiyê bûn. Di şahiyê de Grup Rozerîn û Sosyete Şexo derketin ser dikê. Di şahiya ku sloganên "Bijî Newroz", "Bijî biratiya gelan", "Ji şer re na" hatin avêtin de, govend hate girtin. Di axaftinan de polîtîkayên AKP'ê hatin rexne kirin û hate xwestin ku hemû kes dengê xwe bide DTP'ê.

***

Dêra Hênê

Li Bajaroka Dêra Hênê ya girêdayî navçeya Qilabana Şirnexê piştî 35 salan cara yekem agirê Newrozê hate vêxistin. Namzetê Şaredariyê yê Bajarokê yê DTP'yî Alî Bayram, diyar kir ku ew naxwazin li herêmê xwîn bê rijandin û diyar kir ku êdî naxwazin di pevçûnan de leşker, polîs û gerîlla jiyana xwe ji dest bidin.

***

Şemrex

Li Navçeya Şemrexa Mêrdînê pîrozbahiya Newrozê bi beşdariya hezaran kesî pêk hat. Parlementera DTP'ê Ayla Akat Ata diyar kir ku agirê Newrozê dê heta 29'ê Adarê pê bikeve.

***

ÎTU

Xwendekarên Zanîngeha Teknîk a Stenbolê li kampûsê agirê Newrozê bilind kirin.
Xwendekarên Zanîngeha Teknîk a Stenbolê li Kampûsa Ayazaga agirê Newrozê bilind kirin. Xwendekarên pankarta, "Bijî Newroz" vekir, sloganên, "Bijî Newroz", "Ji Mazlum ê Newroz afirandî re hezar silav" avêtin. Xwendekarên li nav zanîngehê meş li dar xistin, bi şewitandina lastîkan Newroz pîroz kirin. Xwendekaran piştre li ber stranên kurdî govend girêdan.

Ji DÎHA'yê hatiye girtin

Nûçeyên din ên li ser Newroza 2009'an:

- Bajar bi bajar Newroz -2

- Li Wanê 300 hezar kes li ser piyan bû

- Şivan Perwer: Emê dev ji azadiya xwe bernedin

- ŞEV DIŞEWITE

- Bajar bi bajar Newroz -1

- Notên ji Newroza Stenbolê

- Axaftina Turk, Zana û Baydemîr

- Notên ji Newroza Amedê

- Piştî 30 salan Newrozek li Amedê