Mem Mîrxan
Ji hilbijartinê re tam 20 roj man.
20 rojên weke 20 sal.
Hemû partî xebatên xwe yên dawiyê, yên herî bi bandor dimeşînin.
Mitîng, propaganda û bertîl.
Li gundan niha tizbî di dest de her kes hesabê kî yê bibe keya? dike.
Lê ev hilbijartin naşibe tu hilbijartinan.
Li Kurdistanê tenê 2 partî hene.
Yek Dewlet a din DTP.
Ji ber wê hemû lîstik li pey hev têne lîstin.
Çend Mînakên li Amedê;
Li Sûr a Navçeya Amedê tê gotin hemû polêsên li ser sindoqan peywirdar in wê li navçeya Sûrê dengê xwe bi kar bînin. Belê bi hezaran deng dê bi li ber çavên me cih biguherînin. Dewletê li Amedê dev ji hemû şaredariyan berdaye, tenê li ser navçeya Sûrê disekine. Mînaka herî dawiyê Mewlûda kurdî ye?
Min jî piçekî lê temaşe kir. Di rêza pêşiyê de li ba miftiyê Navçeya Sûrê berendamê AKP’ya navçeya Sûrê saf digirt. Mixabin dînê Mihemed jî ji bo hilbijartinê dikin alet. Ew şeva pîroz ji mewlûdê zêdetir dişibiya mitînga AKP’ê. Sed heyf û mixabin hê gelek kes li ser navê dînê didin pey AKP’ê.
Ji Erxeniyê mamosteyekî telefonî min kir, dibêje: “Bi qasî 400 mamosteyên endamê Egitim- Senê li gundan dane ser sindoqê û yên ji bajarên Tirkiyeyê hatine li nava bajêr hatine bicihkirin”.
Li Farqînê, wekî hemû bajarên kurd lê dijîn bertîl têne belavkirin. Lê yên ku bertîlan belav dikin bi gel bawer nakin. Gel didin sondê û sonda wan dikêşin kamerayê.
Em dikarin vê lîsteyê gelekî dirêj bikin.
Wekî rewşa hewayê em dikarin bajar bi bajar vê lîsteya qirêj dirêj bikin...
Lê divê gelê me bizanibe ku rojên dawiyê yên hilbijartinê wê ev bertîl bêtir bêne belavkirin.
Wê walî û qeymaqamê Erdogan hemû qozên di dest de bi awayekî bêperwa bilîzin.
Di hilbijartinên 2004’an de me lîstik bi çavên xwe dîtin. Dewlet û patiyên li ser navê dewletê ketin hilbijartinê bi pêşan pere belav kirin. Xwe davêjin bext û namûsa gel. Hewce bike ji bo rayekê li ber derê wan bûn kûçik.
Çiqas em dibêjin 20 roj mane jî hinek tişt me di tecrubeyên xwe de dîtin, hinek jî ji xwe beloq li ber çavan e.
Ez wisa texmîn dikim ku li gelek bajar û bajarokan em ê bi ferqên mezin qezenc bikin.
Lê li hinek bajaran jî em ê bi 50- 100 dengî an qezenc bikin an jî têk biçin.
Ev jî bi sindoq û ewlekariya wê ve girêdayî ye.
Divê partî bi awayekî gelek cidî li ser sindoqan û ewlekariya sindoqan bisekine û kesên li ser sindoqan dê peywirê bigire perwerde bike.
Piştre bila em li çogên xwe nedin.
***
Hin nivîsên Mem Mîrxan ku di Diyarnameyê hatine weşandin:
- Amed, xewna min a herî şîrîn
- Bêndera xîretê
- Krîterên DTP'ê û rastiya Jiyanê
- Duh dost bi sî û du diranan keniyan ji dil
- Di Ergenekonê de navên kurdan
-
Ji Azadiya Welat hatiye girtin