Va merdimêke bîbî, kedkar bî. Her kar kerdêne. Dewlemend bî. Xizînay cê, bi qasî ma nêşkê bimarê heywanê cê, zehf mal û milkê cê bîbî. Tûtêkey cê jî bîbî. Tût bî pîl, hame wextê zewacî. Va ma şin cirê keynayke biwazê.
Keynayne vînay, xebere dadî û babî keynay rê şirawit, wext girot. înan xo kerd hedre û şî keyna waşte.
Dawete kerde, bûke arde keye. Dimay hîri rocan ra xwezûrî veynda bûke, a berde xizîna mote ci, dimara berd mal û milkê yînan, erdê yînan heme mot ra ci û tera pers kerd:
- Keynay mi, ka vace, ma kar nêkerin, ma eniyan borê go biqediyo ya nê?
Bûke va:
- Baba, la endêke mal û milk, xizîna qedêna?
Xwezûrî va "Temam" û geyray a keye. Bî şan. Veynda tûtê xo û va:
- Lacê mi, ene bûke marê nêbena, ay verade.
Lacî goş şa babê xo, teyaq eyş û a verada.
Sera aşme derbas nêbî, babî reyna şî lacê xo rê keynayke waşte. Reyna dewete kerde. Bûke arde keye. Rocê hîrinan bûke xodir berde miyanê mal û milkê xo. Mal û milk, erd, heywan, xizîna, heme çî motî ra û persa:
- Keynay mi, ma eniyan borê go biqediyo?
Bûke va:
- Baba, eno mal û milk, ene xizîna, heywanî ma qedênê? Ma bikerê pere, birişnê jî nêqedênê.
Babî va "Temam" û geyray a keye. Bî şan, babî reyna tûtê xo ra va:
- Lacê mi, ene pîreke jî torê nêbena. Vera bide.
Lacî joy babî nêke di û fek pîrekey xora vera da.
Sera henî dem derbas bî babî şî keynayna bîne lacê xo rê waşte. Reyna daweteke kerde. Reyna sera çende rocî derbas bî û babî reyna veynda bûkey xo. Reyna a berde miyanê mal û milk, erd û zevî, nîşan da xizîna û heme çî bînî û ayra jî persa:
- Keynay mi, ti vînena zehf mal û milk, xizîna, heywan û çî ma est ê. Ma eniyan borê qedênê?
Bûke va:
- Baba, seyîn nêqedênê. Wele heme dinya ê to bo, ti kar nêkerê, rûşê borê di rojan de tu go biqedênê. Ma enî çî çi yê? Ma rûşê nêxebetiyê ma eşkenê çendeyke de borê biqedênê.
Zehf kêfê xwezûrî hamebî, tam bûkekê gorey aqilê xo ra waşte bî. Va "Temam keynay mi, hadê ma şi keye."
Şî keye, bî şan, lacê xo ra va:
- Lacê mi, temam o, ene bûke tam gorey to ra, tam gorey malbatey mara wa. Wa pîroz û bimbarek bo. Wayir ro pîrekey xo veciye, hûrmet û hezkerdiş nîşanê ay bide.
**
**
Not: Ene hîkaye jo hîkay tûtîtî min bî. Extiyaran vatêne. Ma go enî hîkayan dewam bikerê.
.jpg)
.jpg)
